BEKI SIMBA AOMBA MTIBWA SUGAR SUGAR WAMSAMEHE KWA RAFU MBAYA

Beki mpya wa Simba, Hassan Kessy, ameuomba radhi uongozi wa Mtibwa kutokana na rafu mbaya aliyomchezea, Ibrahim Rajabu ‘Jeba’ katika mchezo wa Kombe la Mapinduzi uliozikutanisha timu hizo hivi karibuni.

Beki huyo kabla ya kutua Simba alikuwa akiichezea Mtibwa, baada ya kutokea tukio hilo viongozi wa Mtibwa walikuja juu na kumshutumu kutokana na kitendo hicho ambacho si cha kiungwana.

Kessy alisema rafu ile ni bahati mbaya na kwenye mchezo inatokea, lakini anaomba asamehewe kwa kitendo kile kwani hana ugomvi na mchezaji huyo.

“Nimeondoka Mtibwa kwa amani na wala sijawahi kuwa na ugomvi kuanzia kwa viongozi mpaka kwa wachezaji kwa sababu mpaka naondoka kila kitu kilikuwa sawa.

“Unajua sikupanga kumchezea rafu Jeba kama inavyotafsiriwa, lakini imetokea bahati mbaya kama sehemu ya mchezo na tunapaswa kusameheana, sasa nafanya kazi pamoja na Simba, hivyo ninahitaji Baraka zao ili nijitume na kufanikiwa,” alisema Kessy.