KWENDA KUSHIRIKI COSAFA CUP KWENYE NCHI WAAFRIKA WANAUWAWA, NI KUJITOJITAMBUA

 

NAAMINI utakuwa umesikia taarifa za mauaji ya Waafrika ambayo yamekuwa yakiendelea nchini Afrika Kusini. Safari hii kwa mara nyingine ni mauaji ya Waafrika wanaowaua Waafrika wenzao.

Kawaida, Afrika Kusini inajulikana kutokana na ubaguzi wa rangi, weupe wamekuwa wakiwabagua weusi. Wakati mwingine wanawatesa kikatili na hata kuwaua, jambo ambalo nchi jirani za Afrika Kusini, ikiwemo Tanzania, zimepambana kweli kuliondoa.

Unakumbuka raia wa Afrika Kusini walioishi Tanzania wakiwemo wale wa Morogoro? Lengo lilikuwa kuwapa nafasi ya kujipanga ili waendelee kupambana hadi waikomboe Afrika Kusini, sasa wamekombolewa, wako huru na wao wameanza kuonyesha walivyojifunza ubaguzi.

Wapuuzi hao wa Afrika Kusini wameanzisha mauaji ya raia wa nchi nyingine za Kiafrika. Mauaji hayo maarufu kama Xenophobia, yamekuwa yakiendelea katika sehemu mbalimbali za Afrika Kusini.

Waafrika wanasema Waafrika wenzao wanachukua kazi zao, wanawanyima wao ajira. Mbaya zaidi si rahisi kusikia ameuawa Mzungu kutoka Sweden, Uingereza au Uholanzi. Waafrika tu ndiyo wanaowabana Waafrika wenzao, upuuzi wa karne zote.

Nchini Afrika Kusini, kuna michuano ya Ukanda wa Kusini mwa Afrika (Cosafa). Inatarajiwa kuanza Mei 17, mwaka huu.

Tanzania ni kati ya nchi zilizothibitisha kushiriki katika michuano hiyo ambayo itashirikisha timu za Botswana, Lesotho, Madagascar, Malawi, Mauritius, Msumbiji, Namibia, Shelisheli, Swaziland, Zambia, Zimbabwe na wenyeji Afrika Kusini.

Kikosi chetu cha Taifa Stars kinakwenda katika mashindano hayo kama mwalikwa kwa kuwa kipo katika ukanda tofauti chini ya Cecafa. Tayari Rais wa TFF, Jamal Malinzi ameweka wazi hisia zake kuhusiana na mauaji hayo kwa kutuma barua kwa Shirikisho la Soka la Afrika Kusini (Safa) kuungana nalo kulaani mauaji.

Safa na TFF wamelaani mauaji hayo lakini hawajapinga muendelezo wa Xenophobia. Upuuzi unaoendelezwa na hao wazembe wa Afrika Kusini unapaswa upingwe kwa nguvu.

Ghana waliokuwa waalikwa, tayari wametishia kujitoa katika michuano hiyo kama itaendelea. Naungana nao na wameonyesha kiasi gani walivyo imara.

Siilaumu TFF, lakini nasisitiza imeonyesha msimamo tofauti ukilinganisha na Tanzania tunavyojulikana. Iko haja ya kuweka msimamo thabiti, hili si jambo dogo.

Hatuwezi kukosa lolote kwa kutoshiriki michuano hiyo ya Cosafa ambayo hatujashiriki miaka zaidi ya 20. Haina faida kwetu kama tunakubali kwenda kwenye ardhi iliyojaa damu ya Waafrika wenzetu wasio na hatia.

Nimeishi Afrika Kusini katika Kitongoji cha Bryanston. Najua tafrani za Jiji la Johannesburg, nimejifunza uharaka wa kuripoti uwanjani kwa mafunzo ya vitendo katika Runinga ya SuperSport.

Nimesoma kozi zangu fupi za mafunzo ya kuripoti kwa ufasaha katika Chuo Kikuu cha Unisa cha Pretoria, nimetembelea miji zaidi ya minne nchini humo. Lengo ni kukuonyesha si mgeni Afrika Kusini.

Nawajua raia wa nchi hiyo, wengi ni wavivu, wasiopenda kujituma, watu wenye kulalamika kila wakati, lakini ni watu wasiojua mapambano ya maisha nje zaidi ya kwao.

Uzembe wao wa kutojituma ndiyo umewafanya wawe walivyo na kusahau hata fadhila za Waafrika wenzao. Tuliona Wazungu waliowabagua weusi walitengwa na jamii mbalimbali ikiwemo kuondolewa katika mashindano chini ya Fifa na Caf.

Sasa vipi Tanzania inakubali kupeleka timu sehemu ambayo Waafrika wanauawa? Vipi TFF inaingia na kusema inaungana na Safa kupinga badala ya kueleza au kuweka msimamo wake thabiti kwamba inataka hivi na kama haiwezekani basi?

Tunajua, kweli si Cosafa inayoua watu au Waafrika Kusini wote wanaofanya hivyo lakini wengi wanaweza kutumikia adhabu ya wapuuzi wachache kama hao wazembe wanaoua watu na TFF inapaswa kuwa imara na kuwa na tafakuri jadidi hasa katika mambo yanayohusu uhai wa wanadamu. Wakiacha sawa, kama wanaendelea, itoeni timu yetu.