PHIRI ASEMA ALIJUA NI VIGUMU KUIZUIA YANGA KUTWAA UBINGWA

Aliyewahi kuwa Kocha Mkuu Simba, Mzambia, Patrick Phiri, ametamka wazi kuwa aliona mapema kuwa kikosi cha Yanga kitaibuka na ubingwa wa ligi kwa msimu huu kutokana na kasi ambayo walianza nayo tangu mwanzo wa msimu.

Phiri, mpaka sasa bado hajafanikiwa kupata timu ya kuifundisha tangu alipotupiwa virago Desemba, mwaka jana ambapo kwa sasa nafasi yake imechukuliwa na Mserbia, Goran Kopunovic.

Akizungumza kutoka nchini Zambia, Phiri alisema kuwa aliona tangu awali kuwa kikosi hicho kitatwaa ubingwa kutokana na maandalizi yake katika michezo yao ambapo walikuwa wanacheza huku wakitafuta ushindi katika michezo yao. 

“Niliona tangu mapema kuwa Yanga wanaweza kuibuka mabingwa kutokana na kasi waliyoanza nayo mwanzoni tu mwa msimu, walikuwa moto na walikuwa wanaonyesha kuwa wana uchu wa kutaka kuibuka na ubingwa.

“Walionekana kuwa bora sana tangu msimu unaanza na wanastahili hiki ambacho wamekipata, lakini pia wakumbuke kuwa wao siyo bora zaidi ya Simba kwani wamefanikiwa kuzifunga timu zote kasoro hiyo pekee,” alisema Phiri ambaye ana rekodi ya kipekee ndani ya kikosi cha Simba kwa kuifundisha msimu mzima bila kupoteza hata mchezo mmoja.

Kikosi hicho cha Yanga kinachonolewa na Mholanzi, Hans van Der Pluijm, kilitwaa ubingwa wake wa 25 juzi Jumatatu, baada ya kuipa kipigo kitakatifu timu ya Polisi Moro cha mabao 4-1 na kufikisha pointi 55 ambazo haziwezi kufikiwa.