MKATABA WA VODACOM, LIGI KUU BARA MWISHO MSIMU HUU

Wadhamini wa Ligi Kuu Bara, Kampuni ya Simu za Mikononi ya Vodacom imemaliza mkataba wake wa miaka mitano ya kuidhamini ligi hiyo, hiyo ni hadi mwishoni mwa msimu huu.

Imeelezwa, tayari makampuni mbalimbali yamegongana katika ofisi za Shirikisho la Soka Tanzania (TFF), yakitaka kudhamini katika kipindi kingine kijacho.

Ligi Kuu Bara inatarajiwa kufikia tamati Mei 9, mwaka huu, wakati huo Vodacom itakuwa imemaliza mkataba wake wa miaka mitano.

Katibu wa TFF, Mwesigwa Selestine, amesema hadi sasa wamepokea maombi lukuki kutoka kwa makampuni mbalimbali kutaka kuidhamini ligi kuu baada ya kuona wadhamini wa sasa mkataba wao umeisha.

“Ni kweli Voda wamemaliza mkataba wao wa kuidhamini ligi kuu na tayari hadi sasa kuna makampuni mengi ambayo yamejitokeza kutaka kudhamini katika kipindi kijacho, lakini hatuwezi kuyataja hadi hapo mambo yakapokaa sawa.

“Kwa jinsi sheria ya kimkataba ilivyo, lazima kwanza tuanze kuzungumza na wadhamini wa kwanza ambao ni Vodacom, kisha ndiyo tuwape nafasi wengine.

“Makampuni mengi yanahitaji kutangaza bidhaa kupitia ligi kwani hakuna kampuni inayokataa kujitangaza, ila kwa sasa siwezi kutaja ni makampuni mangapi yamejitokeza,” alisema Mwesigwa.