JOSEPH OWINO TARATIBU AANZA KUAGA SIMBA

Beki wa kati wa Simba raia wa Uganda, Joseph owino, ameifungia mlango timu yake hiyo kwa kusema kuwa hana mpango wa kubaki tena katika kikosi hicho msimu ujao.

Owino anatarajia kumaliza mkataba wake mwishoni mwa msimu huu ambao alisaini msimu uliyopita. Hata hivyo, kuna wakati alilazimika kurejea nyumbani kwao kwa madai ya kuuguza goti na aliporudi nchini alikuta namba yake imeshachukuliwa na Juuku Murshidi na Hassan Isihaka ambao wametengeneza pacha ya kuelewana katika beki ya kati.

Owino amesema kuwa, kuna timu anafanyanayo mazungumzo kwa sasa na kudai kuwa ataiweka wazi mara baada ya kumalizika kwa ligi.

“Sitarajii kuongeza mkataba mwingine katika timu ya Simba, mimi naondoka na wala sihitaji kubakia tena msimu ujao, nilikuwa najua nini kinaendelea na tangu ilipobakia miezi sita, nilikuwa najua nitakwenda wapi baada ya hapa.

“Mkataba wangu unatarajia kuisha mwishoni mwa msimu huu, hivyo nitaiweka wazi timu nitakayokwenda katika mechi ya mwisho dhidi ya JKT Ruvu,” alisema Owino.