NISHANI ALIYOPEWA NDOLANGA, BORA INGETOLEWA KWA MANYIKA AU BIN SLUM

Na Saleh Ally

NILIKUTANA na Mshauri wa Ufundi wa Rais wa TFF, Pelegrinius Rutahyuga wakati nimekwenda kuhudhuria hafla ya utoaji wa nishani katika waliochangia soka ya Tanzania kwa takriban miaka 50 tangu Tanzania ijiunge na Shirikisho la Soka la Kimataifa (Fifa).

Kama ilivyo kawaida yake, alitumia muda mwingi kulalamika kwamba naandika fitna tu kuhusu TFF, tena akafikia kutoa mfano kuwa Sepp Blatter watu ‘wamemfix”, hivyo hata mimi wanaweza “kunifix”, kwa kuniondoa Championi.

Nikamkumbusha kwamba hapa mimi ni muajiriwa tu, kama ana uwezo wa kuniondoa kweli basi nitafanya kwingine, najiamini kazi yangu, kokote itaonekana tu. Akaenda mbali zaidi, kwamba “kufix” anakozungumzia ni kunipoteza kabisa.

 Nilijua anamaanisha nipotee duniani, nikacheka na kumueleza kamwe mimi si mtu wa hofu ya kifo, hasa kama nitauawa na mtu mwoga kama yeye ambaye anashindwa kujibu hoja za msingi na kutishia au kukimbilia kumpoteza mtu.

 

BIN SLUM (KATIKATI) WAKATI WA KUINGIA MKATABA NA NDANDA.

Msisitizo wangu ulikuwa hivi; “nikifa, ninaamini nimeacha watu wengi waliopita katika mikono yangu, baadhi yao watakuwa hodari, hawatakubali kuwa waoga wala kuukubali unafiki.”

Msisitizo wangu ni kwamba, lile nililolisema Jamal Malinzi katika kazi amezungukwa na watu wengi ambao hawatakuwa na msaada kama Rutayuga ambaye kwangu hata hiyo nafasi ya ushauri wa Rais wa TFF nimekuwa nikihoji, anamshauri ufundi upi, kwa kipi alichowahi kukifanya kikapata mafanikio hadi kuwa hapo?

Kabla ya hapo, Rutayuga alijisifia jambo moja la ajabu kabisa, ukiliita la kipuuzi, kamwe hautakuwa umekosea hata kidogo. Kwamba yeye ni kati ya watu waliojifunza fitna kutoka kwa mwenyekiti wa zamani wa Fat, Muhidini Ndolanga, hivyo kamwe hatishiki na fitna.

Mimi nilikuwa kati ya waandishi wachache tuliobadili uandishi wa fitna kama zile za wakati wa Ndolanga na Ismail Aden Rage kuwa ndiyo habari kubwa, hadi kwenda katika habari za uwanjani. Sasa huyu Rutayuga ambaye ni mshauri wa ufundi, vipi anajisifia kwa ubora wa fitna za uongozi? Hayo ndiyo anayomshauri Malinzi? Upuuzi mwingine huu.

 

MANYIKA PETER (KULIA), MMOJA WA WACHEZAJI WALIOICHEZEA TAIFA STARS 'NJAA' KWELIKWELI, LAKINI WALIPIGANA KWA AJILI YA TAIFA LAO.

Hapo ndipo hoja yangu inapoibukia, kwamba kweli kuna mtu anaweza kujisifia kwamba alifundishwa fitna au jambo na Ndolanga na akajivunia? Hata TFF nishani waliyompa, kwangu naona haikuwa sahihi hata kidogo.

Naikumbuka Taifa Stars ya kipindi kile ambayo ilikuwa ikiweka kambi pale Jeshi la Wokovu jijini Dar es Salaam. Kwa waliowahi kufika kipindi kile wanaweza kuwa mashahidi wangu, palikuwa pachafu, vitanda vibaya na haikustahili kabisa kuishi timu ya taifa.

Utasema hakukuwa na wadhamini, kweli. Lakini haikuwa rahisi kwa shirika lolote kukubali kutoa fedha zake katika Fat yenye migogoro rundo kama ile ya Ndolanga. Fat iliyokuwa na makomandoo hata kuliko Yanga na Simba.

Fat ambayo viongozi waligeuza kama mali yao, walifanya wanavyotaka na hapo ndipo kipindi Tanzania ilipoyumba zaidi kimichezo. Naweza kusema kifo cha soka ya Tanzania rasmi kilianzia wakati wa Fat hiyo ambayo ilikuwa ni ya kibabe, isiyosikiliza watu, isiyojali maendeleo na haikuwa na lolote la kujivunia hadi leo hii.

Nishani ambayo TFF walimtuza Ndolanga, angalau wangewapa baadhi ya wachezaji wa Taifa Stars iliyojaa shida wakati ule kama akina Salvatory Edward, Edibily Lunyamila, Manyika Peter na wengine.

Bado naona nishani hiyo, angalau ingepewa Kampuni ya Bin Slum Tyres ambayo misimu miwili iliyopita ilikuwa kampuni inayodhamini Coastal Union iliyopanda daraja.

Msimu uliopita, kampuni hiyo ikazidhamini timu tatu za mikoani ambazo ni Mbeya City, Stand United na Ndanda FC, mbili ndiyo zikiwa zimepanda daraja. Angalia mfanyabiashara huyo alivyoonyesha mapenzi makubwa katika mchezo wa soka.

Ingekuwa suala la faida, basi angekimbilia Simba, Yanga au Azam FC. Lakini ameonyesha pamoja na biashara, anajali soka kweli kwa mapenzi, kazidhamini timu changa tena za mikoani. Ndolanga amesaidia nini? Ameipa Tanzania kipi cha kumkumbuka zaidi ya yale mahojiano yake na Maulidi Kitenge?

Sasa bado pia najiuliza, huyu Rutahyuga anajivunia kipi hasa kuwa mwanafunzi wa Ndolanga? Ninatafakari, halafu nitarudi tena.