SAKATA LA MESSI LACHUKUA SURA MPYA, SIMBA NAO HAWAKUBALI

MESSI AKIINGIA TFF WAKATI WA USULUHISHI ULIOFANYIKA SIKU CHACHE ZILIZOPITA...

Licha ya Ramadhani Singano ‘Messi’ kuanza ‘kulainika’ na kuwataka Simba wakae na kumaliza sakata lao, uongozi wa klabu hiyo unaona itakuwa vema suala lake na kiungo wao likatolewa msimamo na vyombo husika vya mpira au vile vya dola.

Habari za kutoka ndani katika kikao cha kamati ya utendaji cha Simba kilichokutana jana, zimeeleza uongozi umeona hilo litakuwa sahihi kabla ya mengine kufuatia.

 

MESSI AKIITUMIKIA SIMBA...

“Wamekutana wajumbe na kuzungumza kuhusiana na hilo. Unajua walichoona pale ni kuchafuliwa jina na kuna watu wamekuwa wakisema uongozi umegushi mkataba.

“Uongozi wa sasa haikuingia mkataba na Messi, kama ungekuwa umegushi, ule mkataba mama uko TFF, basi nayo imegushi.

“Lakini inaonekana katika mkataba wa Messi ambao amesema unaisha 2015, ndiyo wenye matatizo mengi. Kumkubalia leo kwamba yameisha, ni kuionyesha jamii kwamba Simba ina tatizo.

“Makubaliano ni kwamba lazima lazima ukweli uwekwe hadharani. Kama kuna kugushi, nani alifanya hivyo na ikiwezekana hatua za kisheria zichukuliwe.

“Viongozi kwa pamoja wamekubaliana hilo litekelezwe ili kufuta kashfa inayoonekana kusukumiziwa kwa Simba wakati haipo,” kilieleza chanzo.

Katika kikao hicho cha kamati ya utendaji, Simba ilijadili mambo mbalimbali yakiwemo ya usajili, mwenendo wa msimu mpya likiwemo hilo la Messi.

Suala hilo limekuwa likiipekeka Simba puta hasa baada ya kiungo huyo kusema mkataba wake unaisha mwaka 2015 huku Simba ikisisitiza unaisha 2016.