INACHEKESHA SANA, MABAO MATATU TU YA KIIZA, HAJI MANARA KAANZA DHARAU KWA MAGAZETI....

Na Saleh Ally

Simba imeshinda mabao 3-0 dhidi ya Kagera, yote yakiwa yamefungwa na Mganda Hamis Kiiza.

Kiiza ndiye mchezaji wa kwanza kufunga Hat Trick msimu huu. Utaona sasa gumzo amekuwa ni mshambuliaji huyo ambaye Yanga ilimuacha.

Yanga iliachana na Kiiza, akaonekana hafai. Simba ikaachana na Amissi Tambwe akionekana hafai, Yanga nayo ikamchukua, sasa anafanya kazi yake vizuri kama ilivyo kwa Mganda huyo.

Huenda hapa kuna jambo la kujifunza kwa kila upande, yaani Simba na Yanga na ikiwezekana wanapaswa kuepuka papara katika mambo yao au wahusika wengi wanaohusika na usajili kuongeza umakini zaidi.

Hilo si la msingi sana, tuwaachie wenyewe. Nimeamua kuandika makala haya baada ya kukerwa na Msemaji wa Simba, Haji Manara ambaye hakika nimekuwa nikiona anaondoka katika misingi ya kazi yake.

Sidhani kama inakuwa ni sahihi msemaji wa timu kuzungumza ukafikia kumfanyia ulinganisho na shabiki wa kawaida yake.

Manara amekuwa akitumia sana neno, “Sisi si timu ya magazeti”, ikionekana wazi hajui umuhimu wa vyombo vya habari katika suala la ushirikiano na klabu au timu yake.

Amekuwa akizungumza huenda katika ‘tone’ ya Kikomandoo zaidi kuliko nafasi aliyonayo. Sitaki kuamini kama Manara halijui hilo au aliipata nafasi hiyo ya Simba kwa bahati mbaya.

Najua walimteua kufanya kazi hiyo baada ya aliyekuwepo kabla yake kuonekana hawezi au ameshindwa na hilo lilikuwa wazi. Lakini bado Manara hajaweza katika kiwango cha kusema hakuna mwingine zaidi yake.

Nimemsikia akihojiwa na E Sport ya Redio ya EFM. Wakati akiulizwa maswali kuhusiana na maandalizi na suala la mechi yao dhidi ya Yanga, alianza kueleza kwamba Simba imesajili vizuri sana na kuliko Yanga.

Lakini akaendelea kusisitiza kwamba wao hawakusajili kwa magazeti, wazo si timu ya magazeti kama wenzao Yanga.

Kauli hiyo, wengi wanaweza kuichukulia kawaida. Lakini ni ile isiyo sahihi kuzungumzwa na kiongozi au msemaji wa klabu kama Simba.

Manara pia anapaswa kuizungumza hiyo kauli akiwa anaangalia anazungumzia sehemu gani. Mtaani kwake, au kwenye kilinge, mfano kwenye kilinge cha kahawa, baa au kwingineko, haiwezi kuwa na tatizo lolote.

Lakini si sehemu ambayo inaaminika yuko kazini, Watanzania wapenda michezo wakimsikiliza, tena akijibu tofauti na alivyoulizwa.

Anaweza kusema ni utani wao na Yanga, sawa, yuko sahihi. Lakini Manara au Simba hawana utani na magazeti.

Zaidi ananishangaza kwamba kila kunapokuwa na jambo wanataka kulitangaza, kawaida huwaalika wana habari na wanaoipa ushirikiano Simba, wengi zaidi ni wanaotoka kwenye magazeti na kufuatiwa na wale wanaotokea kwenye redio halafu runinga, mitandao na kadhalika.

Najua viongozi wa juu wa Simba, kamwe hawawezi kumtuma Manara kuzungumza redioni madudu kama hayo. Kamwe sisemi umefikia wakati wa kumsaidia au kumuongoza nini cha kuzungumza na wakati gani. Yeye ni mtu mzima, anajua nini la kufanya kwa kuwa wakati mwingine atazidi kuumega uhusiano mzuri wa Simba na wanahabari.

Wakati wanazindua jezi, wakati wanatangaza mkataba na kampuni fulani hivi, wakati wana mechi za kirafiki wakihitaji watu wengi ili kurudisha gharama na kupata faida, walikuwa wakitaka urafiki na msaada kutoka kwa wana habari na magazeti yakiwepo.

Kuyadharau kwa kuwa Simba imeshinda mechi tatu mfululizo, sidhani kama ni sahihi. Simba ikipoteza, ndiyo dharau itaisha, au...

Najua Manara kaishabikia Simba miaka nenda rudi, lakini hakuwepo kwenye matatizo mengi ya Simba ambayo wanahabari wa magazeti walishirikiana kuanzia uongozi wa miaka 20 au 10 iliyopita. Manara kama kiongozi, hana hata mwaka, maana yake hakuwa msaada wakati magazeti yakiipigania Simba inayopaswa kuwa na maendeleo au mafanikio kama ambavyo yanaanza kujitokeza leo taratibu. 

Sasa dharau inatokea wapi, kuanza kuonyesha magazeti yanaunga mkono timu fulani na nyingine la. Hivyo anapaswa kuonyesha nidhamu au thamani ya wanahabari. Ajabu wana habari, wanaona sahihi kudharau wana habari wenzao!

Anapotaniana na Yanga, basi afanye hivyo. Akumbuke hata mabosi wake walio madarakani leo, walisaidiwa kwenye kampeni na magazeti pia kwa kuwa yaliwapa nafasi ya kuzungumza na kuwafikia wanachama wao waliokuwa wapiga kura.

Walioharibu wakiwa ndani ya Simba na kuifanya iwe na mwendo wa kubahatisha hadi leo, pia walikemewa na magazeti hadi Wanasimba wakaamua kufanya mabadiliko. Ndiyo Simba ya sasa ambayo imempa ajira Manara na anaitumikia sasa.

Magazeti yanaongozwa na watu, kuyadharau ni kuwadharau wao pia. Itafikia siku nayo yatamdharau Manara na wanaoumuunga mkono.

Katika hali ya kawaida, kumheshimu anayekudharau ni kujidharau pia. Kuna sababu ya Manara kubadilisha njia anayoanza kupita, kuamini kama tayari Simba ni bingwa na anaweza kusema lolote, mbele ya yeyote ni kupotoka, kutojitambua na kudharau wanaomheshimu pia. Nafikiri kazi hiyo awaachie ma-MC wa kwenye harusi, naye afanye kazi yake kwa weledi, akiheshimu kazi za wenzake pia.