KOCHA MZUNGU WA SIMBA AWAITA MASHABIKI MKWAKWANI WAONE KAZI YA SIMBA YAO

Zikiwa zimebaki takribani siku nne kabla ya timu ya Simba kucheza mchezo wake wa kwanza wa Ligi Kuu Bara, msimu huu dhidi ya African Sports, kocha mkuu wa kikosi hicho, Muingereza, Dylan Kerr, ameibuka na kuwataka wachezaji pamoja na mashabiki wa timu hiyo kuwa kitu kimoja kwa sasa.

Simba itaanza msimu kwa kucheza ugenini huko mkoani Tanga, ambapo katika kujiandaa na mchezo huo bado ipo visiwani Zanzibar ikimalizia maandalizi ya mwisho-mwisho huku kikosi hicho kikionekana kuwa imara kila kukicha.

Katika kuhakikisha kikosi hicho kinapata ushindi kwenye mchezo wao wa kwanza, tayari kocha huyo wikiendi iliyopita alikuwa mkoani Tanga na kuishuhudia African Sports ikichapwa na Coastal Union bao 1-0, katika mchezo wa kirafiki uliopigwa kwenye Uwanja wa Mkwakwani ambao Jumapili hii ndiyo watautumia.

Licha ya kuwashuhudia wapinzani wake, lakini hakuwa tayari kusema lolote zaidi ya kusema watu wasubiri siku ya mechi ndiyo wataona mziki wao.

“Kuelekea kuanza kwa ligi, nawaomba mashabiki na wachezaji wa Simba kujivunia kuwa ni Wanasimba, hivyo wanatakiwa kujitoa kwa nguvu zao zote kuhakikisha timu inapata matokeo mazuri katika kila mchezo na hilo linawezekana kama kweli tutaamua mashabiki waje uwanjani wikiendi ijayo wakaone kazi tutakayofanya,” alisema Kerr.