MAKALA KUTOKA GAZETI LA CHAMPIONI: NYOSSO ALIVYOCHAFUA NYUSSO ZA WALIOMTETEA

Na Saleh Ally

 SAA 24 baada ya beki Juma Said Nyosso kumtendea udhalilishaji nahodha wa Azam FC, John Bocco huku uongozi wa Mbeya City ukiwa kimya, nikapata hofu kubwa kutokana na uwezo wao wa uendeshaji wa mambo yao.

Sikuusikia tena uongozi wao kupitia kwa yule msemaji wao mchanga, Dismas Ten akisema lolote. Walibaki kimya ikiwa ni dalili tosha ya kuonyesha kwamba hawakukerwa na jambo lile.

Jumatano Januari 28, mwaka huu, Nyosso alifanya kitendo kama hicho kwa mshambuliaji wa Simba wakati huo, Elius Maguli ambaye hakika alikuwa muungwana hata kwa vyombo vya habari, alitoa ushirikiano wa juu kabisa kwa Blog hii na gazeti la CHAMPIONI licha ya kwamba alidhalilishwa.

Wako waliodai Championi limemdhalilisha Maguli, matusi, maneno makali yalielekezwa kwangu na timu nzima ya Championi. Mpango ukapangwa huko Mbeya na kabla tukaunasa kwamba zinafanyika kampeni gazeti hili lisinunuliwe na mashabiki wa Mbeya City.

Tuling’amua baadhi ya viongozi wa klabu hiyo walioshirikiana na baadhi ya viongozi wa matawi katika hilo. Siku moja kabla ya mechi ya Mbeya City dhidi ya Yanga kwenye Uwanja wa Sokoine, tuliandika kuhusiana na mpango huo na siku iliyofuata walitundika uwanjani bango likiwa na rangi za klabu hiyo, kwamba mashabiki wasisome gazeti la Championi.

Ajabu sana, uongozi wa Mbeya City haukuwahi kusema lolote kuhusu hilo kuonyesha kiasi gani wanajua mpango mzima. 

Lakini kamwe hatukuwa na kosa, badala yake Nyosso aliyefanya ujinga ndiye walipaswa kumuonya. Hivyo ilionyesha pia baadhi ya mashabiki wa Mbeya City wakiongozwa na viongozi wachache kutokana na uchanga wao katika masuala ya soka, walishindwa kujua walichokuwa wanakitetea kwamba kinawapaka matope.

Walitaka Nyosso aendelee au alichofanya kifichwe? Kumbe hawakuona kwamba ni aibu kwa timu ambayo ni changa sana na inahitaji nidhamu ya juu kabisa kufikia hapo.

Mwandishi wetu, Sweetbert Lukonge alikuwa katika wakati mgumu akataka kupigwa na mashabiki wa Mbeya City ambao walipangwa. Lakini mashabiki wa Yanga waliosafiri kutoka Dar es Salaam wakamuokoa, tunawashukuru kwa hilo.

Ukweli, kawaida unaonekana mbaya. Lakini kama kawaida yetu kama timu ya kikosi cha Championi, mambo yakaendelea na tunaendelea kuongoza kwa kuweka mambo wazi hasa maovu hadi hapo wachezaji wote watakaponyooka.

Safari hii, Nyosso amerudia kitendo kama hicho, kwa kuwa Championi hatukuwa waoga mwanzoni, wengine nao wameingia ujasiri wameripoti tukio hilo baya kabisa kufanyika tena likifanywa na mtu mmoja ndani ya miezi minane.

 Mbeya City wamekaa kimya kama ilivyokuwa mwanzo, huenda wanajipanga kumtetea Nyosso ambaye wao wanaamini ni jasiri, anapigania timu yao na huenda akawa shujaa.

 Mbeya City wamekaa kimya bila kujua wanaharibu uhusiano wao na wadhamini kama Bin Slum Tyres, wanaowadhamini kupitia betri bora za RB, Coca Cola na wengine wanaoshirikiana nao kupitia TFF kama Vodacom na Azam TV.

 Swali kwa wale mashabiki wachache wa Mbeya City wasiojielewa, wako tayari kuweka bango jingine kuwa Championi na vyombo vingine vya habari visisomwe Mbeya?

Kama sivyo, wako tayari kuungana na timu ya Championi kukanyaga na kuangamiza upuuzi kama huo wa Nyosso ambao ni adui mkubwa wa soka?

 Nyosso hapaswi kusamehewa, aliomba msamaha. Nasi tukamsaidia kusambaza kwamba anaomba Maguli amsamehe na kamwe hatorudia tena kitendo hicho ambacho aliona ni aibu kubwa hata kwake na familia yake.

 Lakini leo amerudia, ajabu dhambi ile dhidi ya Maguli aliitenda kwa mkono wa kushoto. Safari hii amefanya vilevile kwa Bocco kwa mkono wa kulia. Ingekuwa tunazungumzia mshambuliaji, tungesema “anapiga miguu yote”. Hivyo ni mzoefu, hatari kwelikweli na hataacha maana amezoea.

Tayari sasa Amir Maftah amejitokeza na kusema Nyosso alimfanyia yeye akiwa Yanga wakicheza dhidi ya Simba, akakasirika na kumpiga kichwa, akatolewa nje kwa kadi nyekundu na watu wakasema ‘aliitafuta’ kwa kuwa alihongwa na Simba.

Achana na hivyo, kuna shutuma nyingine dhidi ya Joseph Kaniki kwamba alifanya hivyo Morogoro, akiwa Simba, akapigwa ngumi na Kaniki aliyetolewa kwa kadi nyekundu.

Kama tuhuma hizi, zote ni kweli, kweli huyu mtu atajirekebisha?

Nafikiri kabla ya TFF, Mbeya City lazima wasimame na kuzungumza jambo ikiwezekana kuwaomba radhi mashabiki wao wengi ambao ni waelewa pamoja na wadhamini wao kwa kuwa wote sasa wamechafuliwa na upuuzi wa mpuuzi mmoja tu. Jamaa feki kweli.