SAA 24 BAADA YA UPUUZI MKUBWA WA NYOSSO, MBEYA CITY BADO WAKO KIMYA, INAWEZEKANA KWELI HAWAKUONA KILICHOTOKEA?

Na Saleh Ally

KAMA unakumbuka ilikuwa muda wa saa 11 kasoro hivi wakati nahodha wa Mbeya City, Juma Nyosso alipotenda kosa la kumshika makalio nahodha wa Azam FC, John Bocco.

Nyosso alifanya hivyo kwa makusudi, kitendo hicho cha wazi cha udhalilishaji kwa Bocco ambaye kamwe hakuwahi hata kuingia kwenye kashfa ya ugomvi.

Bocco ni mchezaji anayejituma sana, mchezaji ambaye ameonyesha mifano mingi likiwemo kuwaonyesha vijana kwamba si lazima Yanga au Simba pekee, ndiyo unaweza kupata mafanikio.

Amewahi kuwa mfungaji bora akiwa Azam FC, amewahi kuipa ubingwa Azam FC na yuko kwenye timu ya taifa akitokea Azam FC.

Bocco anaweza kuwa mwalimu mzuri kwa vijana wengi wanaochipukia kuupenda mchezo wa soka hapa nchini.

Amekutana na dhahama hiyo kutoka kwa Nyosso ambaye ni mwalimu mbaya na wa hovyo kabisa. Tena mwalimu asiyefaa, mtu mchafu na asiye na mapenzi na wengine.

Kwani wakati Nyosso anamfanyia hivyo Bocco, tayari alikuwa amefanya kitendo kama hicho hapo kabla, miezi kadhaa iliyopita wakati Mbeya City ilipocheza na Simba, msimu uliopita.

Alifanya hayohayo kwa Elius Maguli wa Simba wakati huo. Jambo ambalo liliwashangaza wengi, ingawa likashangaza zaidi kwa wadau kuvishambulia vyombo vya habari vilivyoonyesha uchafu huo.

Wengi walitaka alichofanya Nyosso, kufichwa. Uongozi wa Mbeya City haukuwa na tofauti kubwa na wahusika, yaani walioona Nyosso hakukosea.

Kwani hawakuwahi kusema alichosema ni kitu kibaya wala kumpa onyo. Lakini hawakuwahi kumuomba radhi Maguli na Simba au kuwaomba radhi mashabiki wao.

Nyosso akafungiwa mechi nane, badala ya kuuona ubaya wake, baadhi ya mashabiki wa Mbeya City, wakiungana na baadhi ya viongozi wageni kwenye mpira wakaungana kuitetea ‘haki’ ya Nyosso.

Nyosso pekee ndiye aliomba msamaha kwa Maguli na kusema anajutia jambo hilo. Akasisitiza hatorudia, akasisitiza amejisikia vibaya, akaongeza wapenda soka nchini wasimtenge.

Safari hii karudia kwa mara nyingine, hadharani vilevile na kila mmoja ameuliza swali hili. “Nyosso, amerudia tena?”

Kwa nini wanasema hivyo, kwa kuwa vyombo vya habari hasa blogu hii na gazeti la CHAMPIONI vilianika hilo waziwazi tofauti na wengi waliotaka lifichwe.

Sasa swali, uongozi wa Mbeya City haujaliona hili. Kukaa kwake kimya kwa zaidi ya saa 24 maana yake nini? Hawajali au haliwahusu!

Katika tukio la kwanza, hawakuomba ladhi kwa mashabiki, wapenda soka wala wadhamini wao ambao wakati tukio la Nyosso linatokea alikuwa amevaa nembo za kibishara za kampuni au bidhaa zao.

Lengo la wadhamini ni kukuza biashara zao. Si kujidhalilisha na kuishusha biashara. Je, Mbeya City hawalioni hilo au wanasubiri hadi wakumbushwe kama hivi, au walaumiwe, au iweje?

Kama wamekuwa watetezi kwa Nyosso, basi wawe watetezi katika heshima ya Mbeya City ambayo haipaswi kuangushwa na Nyosso pekee wakati imejengwa na kupiganiwa na wengi sana.

Najua Mbeya City ni changa, kweli ina viongozi wachanga sana katika mchezo wa soka. Huu ndiyo msimu wao wa pili Ligi Kuu Bara, kisoka kuwaita ndiyo wanachipukia si vibaya sana.

Lakini bado wana nafasi ya kujifunza haraka na kuweza kusoma alama za nyakati kwamba kipindi ni kipi na kipi wanatakiwa wafanye haraka.