PLUIJM 'ACHENJI' GIA, ASEMA KAZI INAANZA LEO DHIDI YA KAGERA TABORA

Kocha wa Yanga, Hans van Der Pluijm ameshtuka na kubadili aina ya uchezaji katika mechi zote za Ligi Kuu Bara watakazozicheza mikoani katika kuhakikisha wanapata ushindi. Yanga, leo Jumamosi inacheza dhidi ya Kagera Sugar kwenye Uwanja wa Ali Hassan Mwinyi, Tabora.

Hiyo ni baada ya kutoa sare yake ya pili katika michezo tisa waliyocheza kwenye ligi. Jumatano iliyopita Yanga ilitoka sare ya mabao 2-2 dhidi ya Mwadui FC, kwenye Uwanja wa Kambarage, Shinyanga.

Yanga ina pointi 20 ikiwa haijafungwa mechi hata moja lakini imeshinda sita na kutoka sare mbili, sare nyingine ya mabao 1-1 dhidi ya Azam FC. Akizungumza na Championi Jumamosi, Pluijm alisema ubovu wa viwanja vya mikoani na wapinzani wao kucheza soka la kuwapania ndiyo tatizo ambalo ameliona huku akitamba tayari amelipatia ufumbuzi.

Kwa kuanzia, Pluijm alisema ufumbuzi huo utaanza kufanya kazi leo katika mchezo wa ligi hiyo dhidi ya Kagera Sugar mjini Tabora.

Pluijm alisema, kikubwa atakachokifanya ni kucheza soka la mashambulizi ya kushtukiza na siyo kupiga pasi kutokana na mazingira ya viwanja vya mikoani.

“Mfumo nitakaoutumia katika mechi tutakazocheza Uwanja wa Taifa (Dar es Salaam) lazima utofautiane na ule ninaoutumiaga katika michezo tutakayoicheza kwenye viwanja vya mikoani.

“Hivyo lazima nibadilishe mfumo kutoka wa kucheza soka la pasi wakati tukiwa na mpira tunafanya mashambulizi kutokana na ubora wa Uwanja wa Taifa tunaoutumia kama uwanja wetu wa nyumbani.

“Pia sitaki wachezaji wangu wagongane bila sababu na wenzao wa timu pinzani kwani wanaweza kuumia bila sababu ya msingi, hapa ni pasi ndefu tu,” alisema Pluijm.