STEWART HALL NA HESABU ZAKE ZINAZOITULIZA SIMBA NA KAVUMBAGU

KAVUMBAGU

Na Saleh Ally

SIMBA imecheza mechi nane, imeshinda sita na kupoteza mbili. Ina pointi 18 katika nafasi ya nne kwenye msimamo wa Ligi Kuu Bara.

Hauwezi kusema Simba ina mwendo mbaya sana, lakini kwa rekodi za misimu mitatu iliyopita zinaibana kwa kuwa mashabiki na wanachama wake wanataka kuiona ile Simba isiyofungika kirahisi, yenye heshima ya kumtandika kila aliye mbele yake.

Mashabiki na wanachama hao wanataka kuiona Simba ambayo ikishindwa kuwa bingwa basi itamaliza katika nafasi ya pili. Je, kikosi cha sasa katika mwonekano wa mechi hizo nane kinaweza kufanya hayo?

Katika hali ya kawaida, jibu sahihi ni hapana. Kikosi cha Simba hakijafikia hapo kwa kuwa kinaonekana ni tegemezi katika sehemu mbili muhimu jambo ambalo ni hatari sana.

Mfano nianzie upande wa Yanga. Kama utasema Donald Ngoma ni hatari sana, akikosa basi ujue Amisi Tambwe atakuumiza, akikosa yeye kuna Malimi Busungu au Simon Msuva ambao nao si rahisi kukukosa.

Kwa upande wa Simba inaonekana mshambuliaji Hamis Kiiza akishindwa kufunga, Simba ipo matatani pia ni nadra mwingine kuibuka na kulibeba jahazi katika wakati mgumu labda bao la ‘fruku’.

Ingawa mwanzo Simba walikuwa wagumu kuhusiana na hilo, sasa wanaanza kuiona halisi na wanakubali kwamba hawana safu bora ya ushambuliaji ndiyo maana wameanza mipango kuhakikisha wanafanya mabadiliko wakati wa dirisha dogo.

Moja ya wachezaji ambao walikuwa sahihi kwao kwa kipindi hiki ni Didier Kavumbagu ambaye amekuwa akibaki katika benchi katika kikosi cha Azam FC kwa kuwa anaonekana si chaguo la kwanza kwa Kocha Stewart Hall raia wa Uingereza.

Hall amekuwa akimtumia Kavumbagu kwa nadra, Simba wameona angewasaidia ambalo ni jambo sahihi kabisa kwa kuwa haina mshambuliaji bora na hata wale wawili wa kigeni, Simon Sserunkuma kutoka Uganda na Pape N’daw wanaonekana ni ‘mizigo’ tu.

 

HALL...

Wakati Simba inamtaka Kavumbagu, Hall ameendelea kutia ngumu, hajakubali hata kumpeleka kwa mkopo Simba kwa kuwa anajua akienda itakuwa ni yeye kujiongezea ugumu.

Ukiachana na Kavumbagu, Hall ana kitita cha washambuliaji ukianza na Allan Wanga (Kenya), Kipre Tchetche (Ivory Coast) na Ame Ali na John Bocco wote raia wa Tanzania.

Bado ana wachezaji kama Farid Mussa na Ramadhani Singano anaoweza kuwatumia kama washambuliaji wa pili, yaani namba 10.

Lakini bado hataki Kavumbagu aondoke. Yeye Kavumbagu anajua hatari ya kukaa benchi, anahitaji kucheza timu ya taifa ya Burundi ambayo ili achaguliwe lazima awe na nafasi ya kwanza katika kikosi cha kwanza.

Hall anakuwa mjanja zaidi, haangalii matakwa ya Simba na Kavumbagu. Anaangalia yeye anataka nini, kikubwa kwake ni kuepusha kuipa Simba silaha zaidi ili iwe imara.

Kuyumba kwa Simba na kushindwa kuwa na safu kali ya ushambuliaji ni sawa na ule msemo wa ‘Adui mwombee njaa’.

Anajua mpinzani wake mkubwa kwa kipindi ni Yanga ambayo ina washambuliaji wengi na ina nafasi kubwa ya kutetea taji lake. Hivyo kuwapa Simba mshambuliaji ambaye anaamini ni bora ni sawa na kuwaamsha ili wazidishe tena upinzani ambao mwisho utakuwa unamuumiza Hall na kikosi chake.

Simba imefunga mabao tisa katika mechi nane. Azam FC imefunga mabao 15 katika mechi hizo na Yanga ni kinara kwa kuwa na mabao 20.

Utaona hapa, upinzani mkubwa ni kwa Yanga. Hivyo ana haki ya kumzuia Kavumbagu ambaye ikiwezekana mara kadhaa atakuwa ‘akimlambisha ice cream’ kwa kumpa nafasi ya kucheza mechi mojamoja.

Kuendelea kumbakiza Kavumbagu Azam, pia ni kuwanyima silaha Simba ambao watalazimika kuhaha kupata mshambuliaji mwingine. Hauwezi kujua, wanaweza kufeli tena kama ilivyokuwa kwa N’daw na Sserunkuma ambao sasa hakuna ubishi tena wanatakiwa kuondoka.

Kuendelea kumzuia Kavumbagu ndani ya Azam, kwa Hall kunaweza pia kukawa na faida kwa kuwa katika suala la washambuliaji kama walivyo wachezaji wengine, hauwezi kujua maana kuna suala la majeruhi au mchezaji mpira tu kumkataa.

Mfano, Mambo yamekuwa magumu kwa Wanga au Bocco, basi Kavumbagu anaweza kupewa nafasi ya kuinua jahazi kama ilivyokuwa juzi wakati alipoichezea Azam dhidi ya JKT na kufunga bao lililoisadia kushinda kwa mabao 4-2 na kupaa hadi kileleni.

HALL AKIWA NA PLUIJM WA YANGA

Kwa hili la Kavumbagu, Hall anaonyesha ni kocha mwenye mipango anayeweza kujua anachokifanya kwa maana ya kuangalia mbele.

Juzi alitoa kauli moja baada ya Azam kuitwanga JKT. Kwamba wanachotafuta wao si kukaa kileleni kwa maana ya nafasi, wanachokipigania ni pointi tatu ikiwezekana katika kila mechi. 

Hapa utaona ujanja wa kocha huyo ambaye anajua wanachotaka hasa ni kipi akijua kupatikana kwa pointi, ndiyo kutakapowapa nafasi bora na ya uhakika na bila shaka ni moja ambayo ndiyo ubingwa.