VIPIGO VYA ARSENAL, MAN CITY, TARATIIIBUUUU LEICESTER CITY YAKAA KILELENI PREMIER LEAGUE

 Kama unashangaa, hiyo ndiyo hali halisi. Leicester City ndiyo wako kileleni mwa Ligi Kuu England.

Leicester wametulia kileleni baada ya vigogo wawili, Arsenal na Manchester City wote kukutana na vipigo.

Arsenal imetwangwa kwa mabao 2-1 na Wes Brom na Man City wakiwa nyumbani, wakakutana na ‘mvua’ 4-1 kutoka kwa wakongwe Liverpool.

Leicester wao wakaitwanga Newcastle kwa mabao 3-0 wakiwa ugenini na sasa wana pointi 28 zinazowafanya wakae kileleni.

Man United ambao walipata ushindi wa mabao 2-1 kwa kuitwanga Watford iliyokuwa nyumbani, wana pointi 27 katika nafasi ya pili.

Huku Arsenal na Man City wakiendelea kubaki na pointi 26 kila mmoja katika nafasi ya tatu na nne.

Ligi ya England ni ngumu na inaendelea. Lakini katika rekodi za msimu huu, hakuna anayeweza kufuta kwamba Leicester iliwahi kukaa kileleni.