RUVU SHOOTING YAANZA KUTEKELEZA KAULI YA MASAU BWIRE, YAITWANGA KAGERA SUGAR 2-0

Ruvu Shooting imejinasua kutoka mkiani baada ya kuitwanga Kagera Sugar kwa mabao 2-0 katika mechi ya Ligi Kuu Bara iliyochezwa kwenye Uwanja wa Mabatini, Pwani.

Ushindi huo umeifanya Ruvu Shooting kufikisha pointi 17 baada ya kuwa moja ya chini zilizo karibu na mkiani ikiwa na pointi 13.

Maafande hao walianza kupata bao lao la kwanza katika dakika ya 55 kupitia Hamis Mcha.

Wakati ikionekana kama wageni Kagera Sugar wangesawazisha, Shooting wakaongoza bao la pili kupitia Alinanuswe Martin katika dakika ya 79.

Kabla ya mechi hiyo, Msemaji wa Ruvu Shooting, alizungumza katika kipindi cha SPOTI HAUSI kinachorushwa na runinga ya mtandaoni ya Global TV na kusema timu yake itawashangaza wengi kwa kumaliza Ligi Kuu Bara katika nafasi ya tano.

“Tuna uhakika wa kubaki Ligi Kuu Bara tofauti na wengine wanavyofikiria, lakini nikuhakikishie hata nafasi ya tano tunaweza kushika.

“Ukiangalia kati yetu na aliye katika nafasi hiyo au hata kileleni, si pointi nyingi za kutisha, sisi tutamaliza tukiwa nafasi ya tano na inawezekana,” alisema Masau akionekana kujiamini.