WAKATI WANAPAMBANA NA SIMBA, WACHEZAJI MTIBWA SUGAR WAIBIWA VITU HOTELINI, KADO MUATHIRIKA MKUU

Wakati wachezaji wa Mtibwa Sugar wakiwa uwanjani wakipambana na Simba, vibaka ambao wanaaminika ni wafanyakazi wa hoteli waliyokuwa wamefikia mjini Morogoro, walikuwa wakifanya kazi yao ya wizi.

Wachezaji wa Mtibwa Sugar wameibiwa vifaa vyao mbalimbali na tayari uongozi wao umethibitisha ukisema kipa Shabani Kado aliyekuwa katika benchi siku hiyo Mtibwa ikilala 1-0, ndiye ameathirika zaidi.

Msemaji wa Mtibwa Sugar, Thobias Kifaru amesema wanaamini baadhi ya wafanyakazi wa hoteli hiyo ndiyo wamecheza mchezo huo mchafu.

“Kwa kweli ni jambo baya sana, Kado ndiyo kaibiwa vitu vya zaidi ya shilindi laki tatu. Tayari tumefungua kasi kituo cha polisi na wametupa ushirikiano mkubwa sana.

“Juhudi za kuwasaka wahalifu zimefanyika na baadhi wameishakamatwa na uchunguzi unaendelea,” alisema Kifaru.

“Tuligundua kuna matatizo baada ya kurejea hotelini tukitokea uwanjani katika mechi ya Simba. Baada ya hapo tukagundua pia hakukuwa kumevunjwa, maana yake walifungua na ufunguo na kuiba katika vyumba mbalimbali.

“Mfano kuna simu, ipad, kompyuta na vitu vingine vya gharama. Ni jambo baya sana hili,” alisisitiza Kifaru akizungumza na SALEHJEMBE.