MSHAMBULIAJI WA ZAMANI COASTAL UNION AANZA KUONYESHA CHECHE ZAKE SAUZ, ATUPIA BAO

Mtanzania Ismail Mgunda ameanza kuonyesha cheche zake baada ya kuifungia timu yake ya Jomo Cosmos bao wakati ikipata sare ya mabao 2-2 katika mechi ya Ligi Daraja la Kwanza Afrika Kusini hatua ya mtoano, jana.

Cosmos inawania kucheza Ligi Kuu Afrika Kusini na inatakiwa kufanya   vizuri mechi zake mbili dhidi ya Leopards na tayari inafuatia mechi ya pili.

Katika mechi hiyo wageni Black Leopards ndiyo walitangulia kupata bao kupitia Musonda na Mgunda aliyewahi kucheza Coastal Union na Ruvu Shooting akasawazisha katika dakika ya 17.

Timu hizo zilienda mapumziko kwa sare ya bao 1-1 na mapema katika kipindi pili, Mwape Musonda tena alifunga bao la pili kwa Leopards na nahodha Thato Lingwati alisawazisha dakika ya za majeruhi na kuifanya Cosmos kuepuka kipigo.

Kabla ya hapo, Mgunda maarufu kama Suma alikuwa anakipiga Gillarpot ya nchini Botswana lakini baadaye akatua Afrika Kusini na kusajiliwa na Cosmos.