MTIBWA WAITILIA NGUMU YANGA KUWARUDISHIA KIUNGO WAO WA ZAMANI, ISHU IKO HIVI

Imeelezwa kuwa uongozi wa klabu ya Mtibwa Sugar umewabania Yanga kiungo wao Hassan Dilunga ambaye wanamuwania kwa sasa.

Taarifa za ndani kutoka Yanga zinaelezwa kuwa wameanza mazungumzo na Mtibwa ili kuweza kuwapatia mchezaji huyo ambaye aling'ara katika msimu wa 2017/18 wa ligi.

Dilunga alionesha kiwango kizuri kwenye ligi na mashindano ya Kombe la Shirikisho, kitu ambacho kimewafanya Yanga kuanza harakati za kumrejesha tena.

Licha ya Yanga kuonesha jitihada za kumrejesha, Mtibwa wameonekana kuwa wagumu kutokana na mchango wake na wakiwa na lengo la kuendelea naye haswa kuelekea mashindano ya Kombe la Shirikisho Afrika.

Ikumbukwe Mtibwa Sugar imeungana na Simba kukipiga kimataifa baada ya kutwaa taji la FA nchini kwa ushindi wa mabao 2-1 dhidi ya Singida United ya Singida.