TIMU YA MBWANA SAMATTA YAZINDUKA, KESHO TENA KAZINI

MBWANA Samatta nahodha wa timu ya Taifa ya Tanzania na klabu yake ya Genk, Juzi aliongoza kikosi chake kupata ushindi mbele ya wapinzani wao Cercle Brugge kupata ushindi wao wa sita kwenye mechi 11 ambazo wamecheza ikiwa na sare moja na imepoteza mechi nne.

Mchezo huo wa ligi uliochezwa juzi ulikuwa na ushindani na ulishuhudia mabingwa watetezi wa ligi ya Ubelgij Genk ikifuta machozi ya kuchapwa na Liverpool mabao 4-1 kwenye mchezo wa Ligi ya Mabingwa Ulaya.

Pia hata mchezo wao wa nyuma wa kwenye ligi waliocheza dhidi ya Standard Liege, Genk ilipoteza kwa kufungwa bao 1-0 hivyo kwa sasa imezinduka na imeanza kuwasha moto.

Bao pekee la ushindi lilifungwa na Sebastean Dewaest dakika ya nane lilidumu mpaka mwisho wa kipindi na kuifanya Genk kusepa na pointi tatu na ipo nafasi ya sita baada ya kucheza mechi 11 na ina pointi 19.

Samatta atakiongoza tena kikosi chake kesho kitakaposhuka uwanjani kumenyana na Antwerp kwenye mchezo wa ligi.