TUKUBALI NA TUBADILIKE, KUONDOLEWA AUSSEMS SAWA LAKINI NDANI YAKE KUNA SIASA…

Na Saleh Ally

NILIFANIKIWA kujua mapema sana kuhusiana na uamuzi wa Klabu ya Simba kutaka kuachana na kocha wake mkuu, Patrick Aussems raia wa Ubelgiji.

Nafikiri hadi leo ni takribani wiki tatu hivi, baada ya wiki moja baada ya kujua Simba walishapitisha nikashea mtandaoni nikisema Aussems ametufundisha mengi wakati akiwa Simba na atakuwa sehemu ya mchango wa kukuza soka nchini.

Kilichofuatia kama ilivyo, wehu wa mtandaoni ambao wana uwezo mdogo wa kujenga hoja wakaanza kutukana. 

Kawaida, ninapoona mtu anatukana matusi hata katika kitu cha kawaida kabisa ambacho kinachotakiwa ni kujenga hoja tu, yeye anatukana naachana naye.

Nafikiri kama ninavyosema aina ya watu hao ni wehu au wendawazimu, ninaamini baada ya kuona Aussems amefukuzwa, sasa wataelewa uwezo wao wa kufikiri na kujifunza kuacha kukurupuka kwa kila jambo.

Mafunzo yanatokana na ujenzi wa hoja, mnajadili na kupata kitu chanya, watu wa aina hii ni watu wanaojitambua. Wapo pia mitandaoni.

Hii si hoja hasa ya msingi niliyotaka kuzungumzia, acha nianze. Ishu ya kufukuzwa Aussems, ilijulikana takribani wiki tatu zilizopita lakini nikaelezwa uamuzi ulipitishwa mwezi uliopita na baada ya hapo, propaganda ikaingia katikati tena bila sababu za msingi.

Ukiangalia zilianza kuzungumzwa hoja kadhaa kuhusiana na Aussems, kwamba aliondoka katika kituo chake cha kazi, alishindwa kujibu kwa nini aliondoka, alikataa kutoa tiketi aliyosafiria, anaingilia mambo yasiyomhusu (hayakutajwa) na kadhalika na hizi ndizo siasa.

Inaonekana wazi uongozi wa Simba haukuwa umefurahishwa katika mambo kadhaa ya kinidhamu na kiwango cha kikosi baada ya kuonekana kama Aussems ameshindwa kuyadhibiti.

Kutokana na hilo, kukawa na muingiliano kwa maana ya CEO wa Simba, Senzo Mazingisa akiamini si sahihi na kocha huyo akiendelea kufanya anachoona sahihi.

Nidhamu mfano, ilionekana kuna wachezaji wameporomoka viwango, mfano Cleotus Chama, Sharaf Eldin Shiboub na Jonas Mkude na bado Aussems akaendelea kuwatetea licha ya kwamba walikuwa “wanaharibu”.

Suala la kiwango, Simba haijashuka kwa kiwango cha kutisha ingawa imekuwa ni kupanda na kushuka. Sababu ya kwamba alishindwa kusonga hadi Ligi ya Mabingwa Afrika hatua ya makundi, ikizungumzwa sasa hivi inakuwa ni kitu cha kushangaza kidogo kwa kuwa tulitarajia isikike kipindi kile cha UD Songo, Simba ikitolewa kiulaini kabisa.

Kwa kifupi kwa maana  ya ushindani wa ligi, bado Aussems alikuwa ni kocha saizi ya Simba na anayewafaa kabisa. Lakini kwa uhalisia kwamba tayari chemistry ya ndani ya Simba katika suala la utendaji, ilikuwa tayari imevurugika.

Hivyo, Simba kumuondoa Aussems kwa maana ya kuangalia mbele na kutengeneza mipango madhubuti ni sahihi kabisa lakini hakukuwa na haja ya kuingiza siasa ndani yake.

Kunapoingia siasa, kunaonyesha bado viongozi wa Simba wana mwendo wa kizamani wa wale viongozi wanaowaogopa wanachama hata wanapokuwa wanataka kufanya kitu sahihi.

Kama unawahofia wanachama kwa kipindi hiki maana yake kuna walakini katika lile unalotaka kuliamua. Kama unaona uko sahihi, chukua uamuzi, fanya mabadiliko watu wakijua kabisa viongozi wamechukua hatua. Ndio maana wanachama na mashabiki wakawaamini kuwa pale katika nafasi hizo muhimu.

Mpira wetu ukianzia Chama cha Soka Tanzania au Fat wakati huo, hadi sasa TFF, klabu za Simba na Yanga na nyingine zenye watu wengi, siasa ndani ya soka imekuwa adui mkubwa wa mabadiliko na maendeleo ya mchezo huo.

Vizuri zaidi ni kubadilisha huu mwelekeo na siasa ibaki kwa wanasiasa, huku katika michezo mambo yaende ‘fast and accurate’, yaani haraka na uhakika na bila kupindisha mambo.

FIN.