MBAYA WA YANGA KAGERE DAWA YAKE YAPATIKANA, MASHABIKI WAITWA UWANJANI LEO

MEDDIE Kagere, mshambuliaji wa Simba ameundiwa jeshi la kazi ndani ya Yanga litakalomzuia asilete hatari ndani ya lango lao kwenye mechi ya kesho litakalokuwa chini ya Metacha Mnata ama Farouk Shikalo.

Kagere mwenye mabao tisa ndani ya ligi pamoja na asisiti mbili aliwaachia maumivu Yanga msimu wa 2018/19 walipokutana Uwanja wa Taifa kwa kufunga bao la ushindi lililowapotezea kasi ya kulisaka taji la ligi Simba iliposhinda bao 1-0.

Akizungumza na Championi Jumamosi, nahodha msaidizi wa Yanga, Juma Abdul ambaye ni beki aliyecheza jumla ya mechi saba kati ya 11 ndani ya kikosi hicho alisema kuwa wanatambua namna ya kupambana na washambuliaji wa timu pinzani.

“Tumefundishwa mbinu nyingi na mechi ambazo tumecheza zimetuongezea hali ya kujiamini tupo sawa na tutapambana kufanya kazi ya kweli uwanjani, ni jeshi la kazi litakalozuia mipango hasa ukizingatia ligi ina ushindani.

“Kikubwa ambacho kinatupa nguvu ya kujiamini ni maandalizi pamoja na mashabiki hivyo tunaamini kazi yetu itakuwa kwa vitendo ndani ya uwanja, tunawaomba mashabiki wajitokeze kwa wingi kutupa sapoti,” alisema Abdul.