YANGA KUMCHOMOA MTUPIAJI HUYU ALIYEWATUNGUA WALIPOKUTANA

UONGOZI wa Yanga umesema kuwa unawafuatilia wachezaji wote wanaoshiriki Ligi Kuu Tanzania Bara pamoja na wale wanaoshiriki Ligi Daraja la Kwanza ikiwa ni pamoja na Gwambina FC ili wapate wachezaji bora watakaomwaga wino msimu ujao.

Habari zinaeleza kuwa miongoni mwa nyota wanayemtazama ni nahodha wa Gwambina FC, Jacob Massawe ambaye aliwatungua msimu wa 2018/19 walipokutana Januari 19 wakati akikipiga Stand United.

“Yanga inahitaji kupata mshambuliaji na kwa sasa inafuatilia kila mchezaji makini ili kuipata saini yake,miongoni mwa nyota anayetazamwa ni nahodha wa Gwambina, Jacob Massawe ambaye anaurafiki mkubwa na nyavu na aliwahi kuwafunga pia msimu uliopita,” ilieleza taarifa hiyo.

Ofisa Habari wa Yanga, Hassan Bumbuli alisema kuwa wamekuwa wakiwafuatilia wachezaji wote wanaocheza mpira ikiwa ni pamoja na Gwambina ila kuhusu masuala ya usajili wakati wake bado.

Massawe ambaye ni nahodha wa Gwambina msimu huu akiwa na Gwambina inayoshiriki Ligi Daraja la Kwanza amecheza mechi 17 na kutupia mabao 10.