KAMATI YA WAAMUZI MNAWAJIBIKA KATIKA HILI

 

Anaandika Saleh Jembe

MARA zote tumekuwa tukisema wazawazi kuhusiana na ubovu wa baadhi ya waamuzi wa Ligi Kuu Tanzania Bara.

 

Hakika wanaboronga na tunaona namna ambavyo tumekuwa tukifikisha malalamiko yetu kwenye Bodi ya Ligi Tanzania (TPLB) pamoja na Shirikisho la Soka Tanzania (TFF).

 

Wako aina tofauti ya wadau wa soka, wengine wanafikisha malalamiko hayo kwa lengo la kulaumu tu ilimradi na hii inatokana na zile jazba wanazokuwa wanazipata kutokana na kero ya waamuzi kutofanya vema.

 

Pia wako wadau ambao wanafikisha kile wanachokiona kwa nia ya kujenga, wanataka kuona mabadiliko yanakuwepo na haki inatendeka.

 

Sote tunajua, kunapokuwa na haki, hakuna malalamiko. Yakiwepo, yanakuwa ni yale yasiyokuwa na msingi na mara nyingi yanapotea kama upepo.

 

Bila ubishi, malalamiko yamekuwa mengi kutokana na makosa na unaona wakati mwingine yanazua hisia za rushwa na kadhalika. Hii inatengeneza ugumu sana katika maendeleo ya mchezo wa soka.

 

Waamuzi wanaovurunda hawatengenezwi au kusimamiwa kwa asilimia mia na TPLB au TFF, badala yake wao wanawategemea wataalamu kutoka katika kamati ya waamuzi wenye jukumu la kusimamia waamuzi sahihi wanaostahili kupata nafasi ya kuchezesha.

 

Hawa waamuzi ili wapate nafasi na kukubaliwa na TPLB au TFF, lazima wataalamu kutoka katika kamati ya waamuzi wawakubali. Sasa vipi viwango vyao vimekuwa hivi na nini hasa kamati inakosa ili kuweka suala la ubora wa viwango kuwa sahihi?

 

Hawalipi maanani? Lazima watasema wanalijali hilo. Lakini sasa vipi hawa waamuzi wa ligi leo ndio mechi ya nane kwenda ya tisa malalamiko rundo.

 

Tumeona tayari mwamuzi amefungiwa mwaka mzima na unaona adhabu yake ilitakiwa afungiwe ikiwezekana aondolewe kabisa kuchezesha ligi kuu maana hakuwa na muda mrefu tokea aboronge mechi kati ya Kagera dhidi ya Yanga na dhahiri hakutakiwa hata kurudishwa.

 

Unaona pia mechi kadhaa hapa, kumekuwa na makosa ya kimsingi na waamuzi wameendelea kusumbuliwa na matukio ya kuotea ambayo katika hali ya kawaida yanaonekana kabisa kuwa yanaepukika.

 

Mechi ya juzi kati ya Simba dhidi ya Mwadui FC, kwa kuwa tu Simba si walalamishi sana lakini pia inachangiwa na wao kushinda mabao 5-0 ndio maana hakuna aliyeyaona makosa ya waamuzi.

 

Mabao waliyofunga Simba yakaonekana walikuwa wameotea lakini ukirudia zile video za tukio kwa msaada wa Azam TV, unaona kabisa hakukuwa na tatizo.

Hivyo hapa unaweza kujifunza wakati mwingine kwamba pamoja ya kuwa kuna hofu ya suala la kutokuwepo kwa uaminifu lakini unagundua pia ni suala la uwezo mdogo wa utendaji wa kazi.

 

Ndiyo maana nikasema kamati ya waamuzi inahusika kwa kiwango kikubwa licha ya kwamba inakuwa imejificha nyuma ya pazia na sisi tukaendelea kuzichambua TFF na TPLB kwa kuwa ndio wakubwa.

 

Ukiwa mkubwa, kweli unapaswa kuwajibika hata kama utakuwa unawawakilisha wadogo zako. Lakini ni vizuri mdogo naye akafanya kazi yako kwa ufasaha ili kuepuka kumpelekea lawama nyingi huyo mkubwa.

 

Hapa ninasisitiza kwamba kamati ya waamuzi inawajibika na uduni wa kiwango kutoka kwa waamuzi hivyo inapaswa kujipanga na ikiwezekana kuwa na rekodi za uhakika kwa wale wanaorudia matatizo.

 

Yaani iwe hivi, kama kuna waamuzi wanaonekana kuwa na matatizo ya kujirudia na yanayofanana, basi vizuri wakaondolewa na kuwe na wengine wanaoingizwa. Lakini suala la uzalishaji wa waamuzi, pia lipewe kipaumbele ili kuwa na watu wengi wa kutosha ili kuepuka kurudia watu wale wale wanaofanya makosa yaleyale.