BREAKING NEWS: SIMBA YATANGAZA RASMI KUMTIMUA KAZI LIEWIG

Baada ya kupiga chenga mara kadhaa huku blogu hii ya Salehjembe ikiendelea kuandika kuhusiana na kufukuzwa kwa Kocha Patrick Liewig.

Blogu hii iliandika kuhusiana na mazungumzo ya Simba na Kocha Abdallah Kibadeni, lakini uongozi ukasisitiza Liewig ndiye kocha na wataendelea naye.

Lakini leo, Kaimu Makamu Mwenyekiti wa Simba, Joseh Itang’are ameweka mambo wazi kwa kusema Liewig ametimuliwa kazi na jukumu amepewa Kibadeni.

“Kibadeni ndiye kocha mkuu, tutamalizana vizuri tu na Liewig, unajua sera ya Simba ni vijana na inaonekana Mfaransa huyo hataki tena vijana.

“Sasa tumeona aende tu na tuendelee na Kibadeni, lakini tutamlipa haki zake zote ili tumalizane vizuri,” alisema Itang’are maarufu kama Mzee Kinesi.

Kwa sasa, Liewig, kocha mzee zaidi kuifundisha Simba katika kipindi cha miaka zaidi ya 15, sasa yuko kwao Ufaransa kwa mapumziko na hajui sakata la kufutwa kazi.