MAMILIONI YA BALE YAMLIZA CESC FABREGAS

Fabregas

Kiungo wa timu ya Hispania, Cecs Fabregas ameonyesha kushitushwa na kitita cha fedha ambacho Real Madrid wako tayari kutoa ili wampate winga Gareth Bale wa Tottenham Hotspurs.

Biashara ya Bale imefikia hadi euro milioni 100 na kama Madrid na Spurs watakubaliana, maana yake utakuwa usajili ghali zaidi duniani.

Fabregas amesema fedha hizo ni maajabu kwake, kwa kuwa ni nyingi na anaona si sahihi.

 

Bale

“Kweli soka linaelekea pabaya, sidhani kama fedha kiasi hicho ni sahihi kutolewa. Mimi nina mawazo yangu na ninaona tofauti sana, kweli siafiki,” alisema Fabregas akiwa katika kambi ya timu ya taifa ya Hispania nchini Brazil ambako wanashiriki Kombe la Mabara.

Hivi karibuni Barcelona ilimnunua mshambuliaji nyota wa Brazil, Neymar kwa kitita cha euro milioni 57.

Lakini Madrid inaonyesha kufanya kila linalowezekana ili kumchukua Bale ambaye msimu uliopita alikuwa mchezaji bora kwa wachezaji wa kulipwa na vijana katika Ligi Kuu England.