KOCHA YANGA ASISITIZA LAZIMA MSHAMBULIAJI WA KIMATAIFA, ASISITIZA YANGA ITAPANIWA MSIMU UJAO

Kocha Mkuu wa Yanga, Ernie Brandts amesema bado anahitaji mshambuliaji mwenye uwezo wa juu ili kusaidia katika kikosi chake.

Brandts ambaye ameelezwa kutofurahishwa na kiwango cha Mnigeria Brendan Ogbu, amesema lazima Yanga usajili mshambuliaji na mchakato unaendelea.

“Kweli bado tunatafuta mshambuliaji, muda unaturuhusu lakini tunajitahidi kufanya haraka kwa kuwa lazima tumpate mshambuliaji wa kimataifa na mwenye uwezo ambao unaonekana ni tofauti au wa ziada.

“Si vizuri kupata mshambuliaji ambaye tunaona uwezo wake hauna tofauti na wachezaji wa hapa nyumbani,” alisema.

Mholanzi huyo alisema Yanga inalazimika kuimarisha ulinzi na kuongeza  nguvu ya ushambuliaji kwa kuwa itashiriki katika michuano ya kimataifa.

Aidha, Brandts amesisitiza wachezaji wa Yanga wanapaswa kujua kuwa msimu ujao utakuwa mgumu kwao kwa kuwa ni mabingwa.

“Unapokuwa juu kila mmoja anapania kukushuka, hivyo kila mechi ya Yanga itakuwa ngumu na yenye ushindani maradufu.

“Wachezaji wangu nimezungumza nao lakini bado nawasisitiza lazima wajitume zaidi na wapambane maana msimu ujao ni mgumu sana kwetu,” alisema Brandts.