METODO: VIPIGO STARS, LAZIMA TUWE WAKWELI

Lazima kuna tatizo, wachezaji au kocha wawe wazi ili tubadili gia

Inaumiza sana baada ya kushuhudia kwenye runinga kikosi chetu cha Taifa Stars kikilambiswa mchanga na Waganda tena safari hii kwa mabao 3-1, kweli sikuamini.

Nasema hivyo kwa kuwa kuna maswali mengi sana yanakosa majibu kama utatulia na kujiuliza huku ukiwa umeondoa ushabiki au mawazo ya kupendelea upande fulani.

Ulimwengu na Samatta:

Akili yangu imekataa kabisa kukubali kwamba imefikia Taifa Stars haiwezi kufanya vizuri bila ya kuwa na washambuliaji Thomas Ulimwengu na Mbwana Samatta.

Kumbuka Stars iliwahi kuwafunga Zambia ambao walikuwa mabingwa Afrika bila ya Samatta na Ulimwengu. Hata kama ilikuwa mechi ya kirafiki lakini Zambia hawakuwa na utani maana walikuwa wanakwenda mashindanoni.

Sawa, ukiachana na mechi hiyo ya Zambia, inaonekana hali imekuwa ngumu katika mechi ambazo Stars imecheza bila ya watu hao, tukianza na ile ya kwanza ya kuwania kucheza Chan ambayo Stars ililala tena kwa bao 1-0 licha ya kuwa nyumbani.

Kweli Stars kama ikiwakosa wawili hao basi ndiyo iwe imepoteza mwelekeo, nafikiri si sahihi na kama hilo ni sehemu ya tatizo, basi lazima lipate ufumbuzi mara moja ili kuepuka kuwa na kikosi tegemezi kisichoweza kujitanua kwa nafasi zaidi bila ya kujali yupi hayupo.

Timbe & Micho:

Bado mawazo yangu yanakinzana na hakuna jibu sahihi zaidi kuhusiana na kukubali eti kwa kuwa Militun ‘Sredojevich ‘Micho’ ambaye ni Kocha Mkuu wa The Cranes na msaizidi wake, Sam Timbe waliwahi kufundisha soka nchini, basi ndiyo maana Stars imetolewa kinyonge na kwa kuonewa kiasi hicho.

Maandalizi mabovu:

Hata hili haliniingii akilini, kwamba kama utasema Taifa Stars ilishindwa kupata maandalizi bora ndiyo maana ikakwama na kufanya vibaya na Uganda. Tuliona mechi ya kwanza maandalizi yalikuwa mazuri tukafungwa jijini Dar.

Mechi ya pili, mapema kwa siku 10, timu ikasafiri na kuweka kambi Mwanza ambako kwa hali ya hewa ni kama Kampala kwa asilimia kubwa. Tukaona wachezaji wakijifua na kila kitu kilionekana kipo safi chini ya TFF na wadhamini wao Kilimanjaro.

Sasa ndiyo nafikia kujiuliza tatizo ni nini kwa kikosi cha Stars ambacho tayari kilijenga imani kubwa kutokana na kuonyesha uwezo wa juu, kugeuka kwua nyanya kwa timu ya Waganda, tena ile inayokosa wachezaji wa kulipwa.

Kama wangesema kuongeza wachezaji wa kulipwa, basi wao wanao zaidi ya 11 wanaocheza nje ya Uganda na huenda katika wote waliocheza mechi dhidi yetu wasingecheza. Lakini sisi kikosi chetu tunao wawili tu ambao ni Samatta na Ulimwengu.

Maana yangu hapa ni hivi, kimahesabu sisi ndiyo tuliopaswa kuwa na kikosi imara zaidi kuliko wao kwa kuwa tumekuwa tukikitumia hiki hata katika michuano mingine mikubwa chini ya Caf au Fifa.

Sasa vipi wanakuja kutunyanyasa kiasi hiki? Ndiyo maana nasema kuna kila sababu kama kuna tatizo, basi likawekwa wazi na kila kitu kikaelezewa wazi kuliko kuficha mambo.

Huu ndiyo wakati mwafaka wa kubadili gia, mashabiki au wadau kwanza watangulize uzalendo kwa ajili ya kulisaidia Taifa kujikwamua hapa lilipo kisoma kwa kuwa kama tutacheza kidogo, basi huenda tukapotea kabisa milele.

Uganda hawakustahili kutushinda, tena kwa kutunyanyasa kwa kutufunga nyumbani na ugenini, nasisitiza kama TFF wanaona inawezekana basi watumie muda huu kutafakari mengi na kama ni tatizo wachezaji au benchi la ufundi basi wafanye mabadiliko mara moja.

Lakini ikionekana kulikuwa na uzembe ambao umetokea kwenye uongozi mfano TFF, basi wawepo watakaokuwa tayari kuwajibika ili mambo yabadilike.

Huenda tukasema mambo mengi sana kama tunalazimika kuwapa nafasi vijana sasa, au tujitoe katika michuano yote na kuanza kuunda timu upya na vinginevto, kumbe sababu inaweza kuwa ndogo na iko ndani ya timu.

Kikubwa cha kufanya ni kila upande ujitadhmini, kama kuna upungufu basi uwekwe wazi na kuanza kufanyika kwa marekebisho. Mfano, niliwaona wachezaji wa Stars wakicheza kwa kiwango cha chini na hata morali ilikuwa chini, kuna tatizo miongoni mwao, au hawana uelewano mzuri na TFF au kuna tatizo jingine basi waseme.

TFF au benchi la ufundi, kama kuna tatizo au wameshindwa pia wawe wazi. Huu si wakati tena wa kuficha uchi kwa kuwa hatutafanikiwa kuzaa. Stars imekwama na mambo ambayo yanaweza kutatulika, hivyo walio ndani au karibu na timu waseme ili tulisaidie taifa letu badala ya kuacha watu wabahatishe tu.

Kuelezana ukweli kumekuwa kukionekana ni kama tatizo miongoni mwetu, lakini hatuna ujanja, hatuwezi kukwepa kwa kuwa ukweli ni dawa hasa bila ya kupendelea au kujali kuna mtu anakasirika. Lakini bado hatuwezi kupeana dawa ya ukweli kama walio karibu au ndani ya timu hawatasema tatizo lililowasibu lilikuwa ni lipi.