NGASSA GUMZO KAMPALA, AFANANISHWA NA EDIBILY LUNYAMILA

NGASSA AKIWA MAZOEZINI JANA NA KIKOSI CHA STARS JIJINI KAMPALA, KULIA NI DAVID LUHENDE NA KUSHOTO FRANK DOMAYO

 Wakazi wa jiji la Kampala nchini Uganda wamekuwa wakimzungumzia zaidi kiungo mwenye kasi wa Taifa Stars, Mrisho Khalfan Ngassa huku wakimfananisha na winga wa zamani wa Yanga, Edibily Lunyamila ambaye jina lake ni kubwa sana jijini humo.

Kwenye mitaa yenye mikusanyiko ya watu jijini Kampala na Entebbe hasa maeneo ya Soko Owino, Kisenyi na Namirembe wamekuwa wakijadili kuhusiana na mechi ya leo ya Kombe la Chan na Ngassa ndiye gumzo kwa Tanzania.

Wengi wamekuwa wakizungumza namna The Cranes watakavyofanya kazi ya ziada kumzuia Ngassa ambaye anajulikana kwa kuwa na kasi kubwa.

Mashabiki hao wamekuwa wakimzungumzia mchezaji wepesi na kasi yake uwanjani na jinsi anavyoutumia mwili vizuri wake mdogo kupenya na mpira kwenye msitu wa mabeki na kufanya mashambulizi kwa kupachika mabao au kumpasia mtu wa kumalizia.

"Yule Murisho Mugasa ni hatari sana yule Mugasa, yaani jinsi vile anacheza ni kama yule mlikuwa mnamuita Lunyamila alivyokuwa akitutesaga pale kwenye uwanja wetu wa zamani wa Nakivubo" alisema mmoja wa Waganda aliyezungumza blogu hii.