WAGANDA WATANGULIZA HUJUMA KWA KUPUNGUZA MSOSI HOTELINI, STARS WAWASHTUKIA

STARS WAKIWA NA MAZOEZI YA MWISHO KWENYE UWANJA WA MANDELA MJINI KAMPALA...TAYARI KIKOSI HICHO KIMETUA UWANJANI HAPO TAYARI KWA MECHI YA LEO

 Daktari wa timu ya taifa, Taifa Stars, Mwanandi Mwankemwa ameilalamikia hoteli ya Mount Zion iliyopo, Kampala, Uganda ambayo wametayarishiwa na wenyeji wao The Cranes, kwa kuwapa chakula kiduchu na ambacho hawaendani nacho na kusema hizo ni mbinu za wenyeji wao, The Cranes kutaka kuwamaliza.

Akizungumza na Championi, Mjini Kampala Dk. Mwankemwa amesema: "Jana Alhamisi ulipofika muda wa chakula cha jioni walituandalia kajichakula kama ka'mtoto na kusema eti hiyo ndiyo futari waliyotuandalia" alilalamika Mwankemwa.

Dk Mwankemwa alisema katika futari hiyo waliandaliwa uji, tambi na ndizi kidogo na baada ya wachezaji kupewa chakula hicho yaliyokea malumbano makali ya kupunjwa msosi wachezaji walilalamikia sana hivyo ikabidi amfuate Meneja Mkuu wa Hoteli hiyo, Onesmus Masingazi na kumlalamikia.

Baada ya kumpelekea meneja huyo malalamiko hayo, meneja huyo alijaribu kusisitiza kuwa hivyo ndivyo alivyopangiwa kufanya na mabosi wake lakini baada ya malumbano kuzidi alikubali kuwabadilishia msosi siku inayofuata na kuahidi kuwaongeza.