ABDALLAH MAJURA AFUNGUKA BAADA YA KUZUSHIWA KIFO

Mtangazaji maarufu wa michezo nchini Abdallah Majura amesema yuko salama na anaendelea vizuri na kazi zake.

Majura amesema hayo punde katika mahojiano yaliyofanyika dakika kumi zilizopita akieleza namna alivyopata usumbufu baada ya kuzushiwa kifo.

“Niko Dodoma naendelea na shughuli zangu, hakika nimepata usumbufu mkubwa sana,” alisema Majura mmiliki wa kituo cha redio cha ABM FM.

“Nimesikia kuna mhadhiri wa chuo cha Diplomasia ndiye amefariki, majina yetu yanafanana na mara nyingi sana watu walikuwa wakitufananisha kupitia majina.

“Sasa watu wakajua ni mimi na wamenipigia simu nyingi sana hadi nilitamani nizime. Lakini mashukuru Mungu niko vizuri na naendelea na kazi zangu.”

Majura aliwataka ndugu jamaa na rafiki zake kuendelea na shughuli zao kama kawaida.

“Unajua hadi watu jukwaa la wahariri walishaanza kujipanga namna ya kuendesha msiba wangu. Lakini waliponipigia wakanipata na tukazungumza.

“Sasa sijui kwa nini imehamia kwangu kwa watu kuamini hivyo lakini kifupi naweza kusema namshukuru Mungu niko salama tu.”