CHEKA AELEZA MKASA WA KUTAKA KUPEWA FEDHA ILI AKUBALI KUPIGWA, ASIMULIA MKENYA ALIVYOMSALITI

 

CHEKA AKIWA NA SALEH ALLY, MARA TU BAADA YA MAHOJIANO

Na Saleh Ally

Bingwa wa dunia wa ngumi za kulipwa, Francis Cheka, anayetambuliwa na Shirikisho la Ngumi la WBF, anasema hadi anafikia kubeba ubingwa huo kwa kumchapa Mmarekani, Phil Williams, amepita mambo mengi ya kukumbukwa.

Williams ni kinyozi lakini alikuwa fiti na kumpa Cheka wakati mgumu, ingawa baadaye alifanikiwa kutwaa ubingwa huo akiwa Mtanzania wa kwanza kumchapa Mmarekani katika ardhi ya Tanzania.

Cheka anasema amekuwa akipitia mambo mengi katika mchezo huo na wakati mwingine amekuwa akifikia hadi kukata tamaa akifikiria kuachana na mchezo huo, lakini hawezi kufanya hivyo kwa kuwa ndiyo kazi yake.

“Mambo ni mengi, huenda ni vigumu sana kwa mashabiki namna wanavyokwenda. Nimekuwa na hofu kubwa wakati mwingine hadi kufikia kuwaza kwamba ninaweza kuacha mchezo wa ngumi na kufanya mambo mengine.

“Mfano, angalia katika pambano ambalo nilikwenda kucheza kule Ujerumani, nilikutana na bondia mmoja anaitwa Uensal Arik ambaye naweza kusema si mbaya kwa maana ya kuwa na uwezo.

“Lakini baada ya kufika tu katika Mji wa Berlin, nikiongozana na wakala mmoja Mkenya, nilianza kufanya mazoezi na kocha mmoja Mjerumani, nafikiri. Kama siku mbili hivi, kumbe yule kocha akapeleka taarifa kwa yule mpinzani wangu kwamba mimi nilikuwa mkali.

“Wakati nikiendelea kusubiri pambano, yule bondia alituma watu na kuwataka wanishawishi nichukue fedha halafu nimuachie anipige katika pambano hilo.

“Nilitaka kujua ni kiasi gani, nikaelezwa ni euro 5,000 (nilipotaka kujua kwa fedha za Tanzania, nikaambiwa inafika hadi Sh milioni 11. Niliona fedha nyingi sana na huenda nikazihitaji sana kwa ajili ya maisha yangu.

“Lakini nilisema nataka kutimiza ndoto zangu za kuwa bingwa na kushinda pambano langu Ulaya, hivyo nikashikilia msimamo kwamba nilitaka mshindi apatikane pale ulingoni bila ya hongo.

“Awali nimewahi kusikia kuwa kuna mapromota wanawapeleka Watanzania wakashindwe na kulipwa. Mimi sikukubaliana na hilo, halafu nilikuwa ninadai euro elfu tano za pambano hilo. Hivyo nikajua nitazipata hizo na nilikuwa na uhakika wa kushinda.

“Sikupata nafasi ya kuongozana na kocha wangu, walieleza kwamba nilitakiwa kwenda na wakala ambaye ndiyo angekuwa msaidizi wangu ulingoni. Basi nilifanya hivyo kweli na pambano lilianza na ukweli nilifanikiwa kutawala kuanzia raundi ya kwanza hadi ya saba.

“Kilichonitokea hadi leo sijawahi kusahau, yule msaidizi wangu ulingoni alirusha taulo ulingoni eti nilikuwa nimezidiwa. Lakini haikuwa kweli, ukitaka nenda youtube uiangalie ile video. Hali ile ilinitia shaka sana, niliona kulikuwa na njama yule Mkenya alifanya.

“Huenda yeye alifaidika na kushindwa kwangu, huenda baada ya kukataa walichoniambia, labda walizungumza naye pembeni. Nilimueleza wazi kwamba alinimaliza, nilikasirika na hata machozi yalinitoka,” anasema Cheka.

“Ajabu zaidi, hadi leo sijapewa hata ile euro elfu tano kwa ajili ya kumalizia malipo ya pambano hilo. Ajabu hata aliyenitafutia pambano amekuwa kimya na hanisaidii lolote, kitu ninachoona si sahihi.”

Kingine ambacho kinampa Cheka hofu katika maisha yake ya ngumi, anasema si ubabe wa bondia yeyote anayekutana naye, badala yake ni kumaliza mchezo huo akiwa hana hata fedha ya kuendeleza maisha yake.

“Bado ninaona mabondia tunalipwa kidogo sana, kamwe siwezi kusema na kumlaumu Rashidi Matumla. Kila siku amekuwa akilalamika, huenda watu wanaona kama alitumia fedha vibaya, mimi naona tofauti kabisa.

“Mabondia tunalipwa kiasi kidogo sana, fedha nyingi tunazolipwa zinaishia kwenye maandalizi tu. Baada ya kucheza pambano unakuwa huna kitu tena na hii inatokana na mabondia wengi kutokuwa na wadhamini wanaoweza kuwafanya wawe na fedha za maandalizi na zile wanazolipwa zibaki kama sehemu ya kujiendeleza kimaisha.

“Najiangalia naona kama nimebakiza miaka mitatu hivi ya kuendelea kucheza ngumi na kufanya vizuri. Je, nina nini hasa kimaisha? Hapo ndiyo nimekuwa nikichanganyikiwa sana, sitaki kufikia alipo Matumla sasa.

“Nataka kumtumia Matumla kama somo, huyu jamaa mimi ninamheshimu sana tofauti na watu wanavyofikiria, maana amenisaidia kuwa bora lakini nasikia uchungu ninapoona hana maisha mazuri. Sitaki na mimi niwe hivyo na hata mabondia wengine wanaofanya vizuri sasa wanapaswa kutafakari,” anasema Cheka.

Cheka, maarufu kama SMG, anasema ataendelea kucheza ngumi za kulipwa, kwani pamoja na mchezo huo kuwa ofisi lakini ana mapenzi makubwa sana, hivyo ataendelea kujituma huku akihamasisha fedha nyingi zaidi kuwekezwa kwa wanaojituma kama ilivyo kwake.

SOURCE: CHAMPIONI