KOCHA MPYA SIMBA AMTUPIA UJUMBE SELEMANI MATOLA

Kocha Mkuu wa Simba Zdravok Logarusic, amemuulizia msaidizi wake Seleman Matola katika mazoezi ya siku mbili akamkosa, lakini akamtumia ujumbe wa sifa anazotakiwa kuja nazo katika timu hiyo.

 Logarusic, ukipenda muite Loga, amesema mpaka jana Jumanne asubuhi, ameshafanya mazoezi katika vipindi viwili tofauti bila msaidizi wake huyo, lakini anataka atakaporipoti ajue anakuja kumsaidia kweli ikiwemo kutoa ushauri, si kumsikiliza na kufuata kila kitu atakachosema.

Loga raia wa Croatia, amesema atamfukuza mara moja msaidizi wake atakayekuwa na kazi ya kusema “ndiyo mzee”, katika kila atakalomweleza, ambapo anataka atakapoona kuna kitu hakiko sawa aweze kujenga hoja kwa kumshauri kwa lengo la kupunguza makosa watakayoweza kuyafanya.

“Nimeanza kazi rasmi jana (juzi) na leo (jana), pia nimekuja kazini, lakini katika siku hizo mbili nimeuliza yuko wapi msaidizi wangu, nikajibiwa anakuja lakini simuoni. Sitaki kuingia ndani sana katika hilo, lakini atakapokuja anatakiwa kuelewa kuwa anakuja kunisaidia akiwa kama msaidizi wangu si kukubali kila nitakachosema alisema Loga.

Matola ambaye ni kocha wa timu ya vijana ya Simba, alipoulizwa jana sababu za kumfanya achelewe kujiunga na timu kubwa, alisema:

“Bado niko kwenye mazungumzo na uongozi kuhusiana na mkataba, tukimaliza vizuri basi nitaanza kazi mara moja, hivyo kocha avute subira kidogo maana vizuri kuanza kazi ukijua utaratibu.”

Taarifa nyingine tulizozipata wakati tunaenda mitamboni zilieleza, Matola hakuwa na mkataba Simba hata katika timu ya watoto anayoifundisha, hivyo alikuwa anasubiri kusaini mkataba mpya kama kocha msaidizi.