KASEJA ATUA MAZOEZINI YANGA, AJIKUTA PEKE YAKE..AENDELEA KUKAMUA HUKU MASHABIKI WAKISHUHUDIA

Katika hali isiyo ya kawaida kipa wa Yanga, Juma Kaseja, jana Alhamisi alijaza mashabiki wa timu hiyo katika Uwanja wa Bora Kijitonyama alipokuwa akifanya mazoezi binafsi bila kuwa na wenzake ambao hawakuwepo.

SALEHJEMBE ilishuhudia mashabiki wengi wakikusanyika uwanjani hapo kuangalia mazoezi ya Yanga lakini wakamkuta Kaseja, ambapo alikuwa akifanya mazoezi huku akisaidiwa na rafiki zake waliokuwa wakimrushia mipira.

Akizungumza na Championi Ijumaa, Kaseja alisema kuwa alikuwa akifanya mazoezi binafsi kwa kuwa wenzake wapo kwenye mapumziko.

“Nilikuwa na taarifa kabisa kuwa timu haitakuwa na mazoezi kwa sababu tuna kikao klabuni cha wachezaji na viongozi ndiyo maana nikaamua kuja kufanya mazoezi yangu binafsi.

“Kuna rafiki yangu anaishi hapa karibu ndiye nimekuja naye kunifanyisha mazoezi hapa uwanjani kwa sababu siku nyingine huwa naenda ufukweni,” alisema Kaseja ambaye wakati anaondoka uwanjani hapo alilazimika kuruka geti kwa kuona akizunguka atachelewa.