IVO AIGIZA NENO USAJILI SIMBA

Katika kuhakikisha kikosi chao kinaimarika vyema kwa ajili ya msimu ujao wa Ligi Kuu Bara, Kipa namba wa Simba, Ivo Mapunda, ameutaka uongozi wa timu hiyo kuhakikisha unafanya usajili wao kwa kupitia ripoti ya kocha Mcroatia, Zdravko Logarusic.

Kauli hiyo ameitoa hivi karibuni wakati timu mbalimbali zikiendelea na usajili wao ambapo Simba wenyewe wanamuwinda mshambuliaji wa Mbeya City, Saad Kipanga na beki wa pembeni wa JKT Ruvu, Edward Charles anayekipiga JKT Ruvu.

 Ivo alisema kuwa timu yao kocha ndiye anayejua upungufu katika kikosi chake, hivyo ili timu ifanye vizuri basi lazima usajili ufanywe na yeye.

Alisema kuwa, katika kikosi chao sehemu nyingi zilikuwa na upungufu ambao unahitajika kuboreshwa katika kukiimarisha zaidi ili ubingwa wa msimu ujao wauchukue wao.

“Siku zote usajili unafanywa na kocha na siyo viongozi wa timu, hivyo katika kuhakikisha kikosi chetu kinaimarika zaidi basi ripoti ya usajili aliyoiacha kocha ndiyo ifanye usajili.

“Zipo sehemu nyingi nilizoziona katika msimu uliopita ambazo zinahitaji kuboreshwa, ikiwemo kuiboresha safu ya ulinzi kwa kuanza na mabeki wote watatu wa pembeni namba mbili na tatu,” alisema Ivo na kuongeza:

“Pia wanahitajika viungo, washambuliaji na mawinga wenye uwezo na uzoefu mkubwa wa kucheza soka ili na sisi msimu ujao tufanye vizuri ikiwemo kuchukua ubingwa, tushiriki michuano ya kimataifa baada ya kukosa ya mwakani.”