PONDAMALI ASEMA BAADA YA YANGA ATASTAAFU, HALAFU ANAGEUKIA NGUMI ZA KULIPWA

PONDAMALI (KATIKATI) AKIWAFUA MAKIPA WA YANGA, DIDA NA BARTHEZ

Hauna haja ya kuona ni ajabu, lakini ndiyo uamuzi wa Kocha wa Makipa wa Yanga, Juma Pondamali, amesema mara baada ya kumaliza mkataba wake na Wanajangwani, atastaafu soka.

Atakapostaafu atafanya kazi ipi? Pondamali anasema anayo, anaijua nayo ni masumbwi!

Pondamali amesema hana mpango wa kuendelea tena kufundisha soka kwa kuwa umri unaenda, hivyo atageukia katika masuala ya kibiashara pamoja na kuwa muandaaji wa michezo ya ngumi za kulipwa hapa nchini.

“Mimi ni ‘coordinator’ wa ngumi ambapo kuna mwenzangu tunatarajia kushirikiana naye, tayari tumeshapata ‘document’ zote zinazohusiana na masuala ya kuandaa ngumi.

“Kwa sasa nimeandika ‘proposal’ na kupeleka katika kampuni mbalimbali ili niweze kukubaliwa na kufikia tamati kwani kila kitu kinakwenda sawa na iwapo nitafanikiwa basi nitajiingiza kwenye ngumi rasmi.

“Sina mpango wa kuongeza mkataba mwingine Yanga, wala kusaini timu yoyote ya ligi kuu, naona ni bora niachane na masuala ya mpira baada ya kumaliza mkataba wangu.

“Nimekuwa kipa wa timu ya taifa kwa muda wa miaka 10 na kocha wa makipa timu ya taifa kwa muda wa miaka saba, tangu enzi za Maximo na timu tofautitofauti na sasa nipo Yanga, hivyo naona inanitosha.

“Natarajia kwenda kukaa Tanga Handeni ambako ndiko nilipozaliwa ili niweze kuendeleza biashara zangu pamoja na mambo ya ngumi,” alisema Pondamali.