TAKUKURU WASABABISHA HOFU KUU KWA WAGOMBEA SIMBA

Kitendo cha maofisa wa Taasisisi ya Kuzuia na Kupambana na Rushwa Tanzania (Takukuru), kuvamia usaili wa nafasi mbalimbali za uongozi Simba, kimewashtua wagombea wa timu hiyo.

Tukio hilo la maofisa hao kuvamia usaili huo wa uchaguzi uliofanyika kwenye Ukumbi wa Polisi Oficer’s Mess uliopo Masaki jijini Dar es Salaam lilitokea hivi karibuni.

Maofisa hao wawili walifika hapo majira ya saa 6:15 na kuondoka saa 6:49 mchana na kuangalia mazingira ya hapo kabla ya baadaye kuingia kwenye ukumbi maalum uliotengwa kwa ajili ya usaili ili kuchunguza baadhi ya mambo na baadaye kuondoka na nyaraka na namba za simu za wagombea.

Ujio huo wa maofisa hao uliwashtua wagombea hao na kusababisha kuanza kuhoji sababu ya Takukuru hao kufika na kusitisha kwa muda zoezi hilo la usaili lililokuwa linaendelea kwa upande wa wajumbe baada ya kumaliza nafasi ya rais na makamu wake.

“Kipi kimewaleta hapa Takukuru, kuna nini kinachoendelea kwani, mbona amani na usalama upo wa kutosha? Wao walitakiwa wasubirie tumalizie usaili kwanza, hayo mengine yafuate baadaye,” alisikika mmoja wa wagombea hao.