WAKONGO WASUBIRI SIMBA ITOE JIBU ILI WAMBEMBE AMISSI TAMBWE

 

TAMBWE (KUSHOTO) AKIWA KAZINI DHIDI YA PRISONS YA MBEYA.

Timu mbili za nchini DR Congo moja ikiwa ni DC Motemba Pembe zimeendelea kusubiri kwa hamu ili zipate nafasi ya kumtwaa mshambuliaji, Amissi Tambwe.

Timu hizo mbili zipo tayari kumwaga mamilioni ili kumpata mshambuliaji huyo, mmoja wa wakali kabisa katika ukanda wa Afrika Mashariki na Kati.

Tambwe raia wa Burundi amebakiza mkataba wa mwaka mmoja na Msimbazi na habari za uhakika kutoka ndani ya Simba, zimeeleza timu hizo za DR Congo zinamtaka Tambwe baada ya kufanikiwa kuwa mfungaji bora wa Ligi Kuu Bara.

“Lakini Simba hawajasema kitu na Wakongo wanasubiri kwa hamu, uongozi ukitoa jibu kuwa unataka shilingi ngapi, kila kitu kitakuwa wazi,” mtoa taarifa alisema.

Tambwe ambaye yuko jijini Dar es Salaam, pia alisema timu hizo ziliwahi kumtafuta naye akazikabidhi kwa Simba.

“Bado nina mkataba wa mwaka mmoja, hivyo nilifuata utaratibu,” alisema Tambwe na kuongeza: ”nikawaambia wawasiliane na Simba, wameniambia wamefanya hivyo na sijui kinachoendelea hadi sasa.”