KOCHA STAND UNITED ASISITIZA TIMU YAO ITASHANGAZA WENGI LIGI KUU BARA

SIKU UONGOZI WA STAND UNITED ULIPOINGIA KWENYE UDHAMINI WA BIN SLUM TYRES CHINI YA BIDHAA ZA MATAIRI YA VEE RUBBER.

Kocha Msaidizi wa Stand United, Athuman Bilal ‘Bilo’ amesema Stand United itawashangaza wengi kwenye Ligi Kuu Bara inayotarajia kuanza Septemba 20.

Kwa sasa Stand United inadhaminiwa na kampuni ya Bin Slum Tyres Ltd inatengeneza matairi bora ya Vee Rubber na betri ngumu za RB.

Bilo ambaye ni beki wa zamani wa Shinyanga Shooting na Pamba ya Mwanza amesema kikosi chao kimekuwa kikifanya mazoezi makali sana kwa lengo la kuanza ligi na ushindi.

“Lengo ni  kuanza na ushindi na baada ya hapo kuendelea na ushindi. Utaona sasa tunahamia Mwanza kwa ajili ya kambi kuonyesha tunataka kweli kufanya vizuri.

“Ushindi una mambo mengi, si pointi tatu, lakini inainua morali ya wachezaji na mnaweza kuendelea na kushinda.

“Angalau sare halafu muendelee na kushinda. Hivyo tunahitaji kupata pointi angalau kila mechi,” alisema Bilo akionyesha kujiamini.

Stand United ndiyo imepanda daraja na kurejesha Ligi Kuu Bara katika mkoa huo kwa zaidi ya miaka nane baada ya Shinyanya Shooting kuteremka daraja.