JIFUNZE KUHUSU TARDELLI, RUDI KWENYE IMANI YA WABRAZIL NA KILIO MILELE CHA WATANZANIA

Na Saleh Ally

TARATIBU Brazil inaanza kusahau machungu ya kupoteza kwa idadi ya mabao 7-1 dhidi ya Ujerumani katika mechi ya robo fainali ya Kombe la Dunia.

Michuano hiyo mikubwa ilikuwa inafanyika kwenye ardhi ya Brazil ambayo ilikuwa inahitaji ushindi  ili itimize ndoto ya kwenda fainali, ikashindikana.

Maumivu makubwa zaidi yakawa kwenye kipigo hicho, taifa likazizima, lakini hakuna lisilopita ingawa halitapotea kwenye historia ya soka la Brazil.

Wabrazil walijua litapita lakini haiwezi kuwa lahisi, wameanza kulifanyia kazi taratibu ikiwa ni pamoja na kumuondoa Kocha Fellipe Scolari, kwa mara nyingine wakamuamini Dunga.

Tokea amerejea, Dunga ameiongoza Brazil mechi tatu bila ya kupoteza hata moja, huku akishinda zote mfululizo.

Hii ni furaha, raha na taratibu imani ya Wabrazil inarejea, pia inaondoa hisia kuwa ndiyo mwisho wa nchi yao kutamba kisoka ulimwenguni.

Pamoja na hivyo, mabadiliko kadhaa aliyoyafanya Dunga yameonyesha ujasiri, mfano kumrejesha Kaka kwenye kikosi hicho, lakini kumteua mshambuliaji Diego Tardelli Martins.

Tardelli si mgeni kwa Wabrazil wapenda soka, anakipiga katika klabu ya Atletico Mineiro ya Brazil, anajulikana kwa staili yake ya ushambuliaji kama mtu anayewamaliza adui kwa bastola mbili mikononi mwake, huku akipiga “pa, pa, papapapa”.

Ndoto kuu ya Tardelli ilikuwa ni kuichezea Brazil, mara baada ya Dunga kumrejesha, amekuwa dawa mpya ya kuhakikisha urejeshaji wa matumaini ya Wabrazil kuwa huenda mambo yako sahihi.

Kwamba ushindi wa mechi mbili zilizopita, moja ikiwa ni dhidi ya Colombia, si wa kubahatisha, badala yake Brazil imerejea tena kwa kuichapa Argentina kwa mabao 2-0 katika mechi ya kirafiki iliyokuwa inasubiriwa ka hamu ulimwenguni kote na ilichezewa nchini China, pia kombe likatolewa.

Tardelli alifunga mabao yote mawili yaliyoizamisha Argentina na sasa ndiye mjadala kama kweli ni sahihi kuvaa jezi namba tisa iliyowahi kuvaliwa na wakali kama Ronaldo.

Wengi wanaona ni sahihi ukilinganisha na Fred ambaye alionekana kutokuwa msaada hata kidogo kwa Brazil.

Uwezo aliounyesha Tardelli katika mechi hizo mbili umekuwa gumzo lakini raha zaini ni mabao yake mawili yalivyobadili upepo wa Brazil.

Brazil imeona imejikwaa sehemu, ilipoanguka haikuangalia ilipoangukia, badala yake ilipojijwaa na sasa mabadiliko madogo yanaanza kurudisha imani upya na hasa kutokana na timu kufanya vizuri.

Brazil imeamua kurekebisha kosa la miezi kadhaa iliyopita na sasa mambo yanaonekana kwenda sawa.

Tanzania ina kosa la tokea miaka 34 iliyopita, lakini halina dalili ya marekebisho au harufu ya mafanikio!

Timu ya taifa, Taifa Stars ilishiriki michuano ya Kombe la Mataifa Afrika mwaka 1980, hadi leo haijapata nafasi hiyo, angalau kidogo TFF chini ya uongozi wa Leodeger Tenga ilipokwenda kushiriki michuano ya Kombe la Mataifa Afrika kwa Wachezaji wa Ndani (Chan) mwaka 2009, kule Ivory Coast.

Ukiachana na hiyo angalau, juhudi za kumaliza tatizo hilo sugu na maumivu makubwa kwa Tanzania, hazionekani.

Viongozi wengi wanaoingia madarakani ni aina ya wale wanaotaka kutetea maslahi yao tu, wasiojali wala kuumizwa na historia inayoubana moyo wa Kitanzania katika kupenda soka.

Tanzania kupitia TFF, inaendeleza malumbano, kuwaza mipango ya kuwafungia watu kupitia kamati zake zenye lengo la kukomoana na kila anayekosoa ni adui.

Brazil walikubali kukosolewa, wakakiri, wakafanya mabadiliko na sasa wanaonekana kutengeneza njia nzuri kutoka kwenye kosa.

Miezi kadhaa tu baada ya kuharibikiwa, sasa wanaonekana kuvuka kuingia upande wa pili kwenda kujirekebisha huku wakiwaamini hata ambao hawakuaminiwa kama Tardelli ambao sasa ndiyo suluhisho la safu ya ushambuliaji ya timu yao ya taifa.

Tanzania inalia miaka 34, inapambana kupata nafasi hiyo miaka nenda rudi na walio madarakani sasa ni afadhari ya jana. Ushirikiano hakuna, mapenzi ya kufanya kazi pamoja kwa ajili ya utaifa yamekufa na soka linaongozwa na wengi wasiojua lolote.

Brazil wameweza kurekebisha mambo na maumivu ndani ya siku chache tu. Tatizo wameshindwa na wanazidi kuongeza maumivu huku ‘midomo’ ikitawala kwa kutembea zaidi kuliko ‘mikono’ kwa ajili ya utendaji.

Nani ataiokoa Tanzania? Ukisema uongozi wa sasa wa TFF, jibu litakuwa ni kosa kubwa. Kama si wao, atatokea wapi wa kuanzisha mipango kama ya Wabrazil baadaye wapatikane akina Dunga ambao watawatafuta watu kama Tardelli.

Watu hawaaminiani, hawapendani na ajabu hawashirikiani lakini wanataka Tanzania icheze Kombe la Mataifa Afrika! Haya ni maajabu na ikiwezekana, miaka mingine minge ya hadithi ileile imewadia sasa kukamilisha majonzi na maumivu ya miaka 28 iliyopita, huku wengine wakijifaidisha wao na rafiki zao kupitia soka yetu.

Kwa wanaoumia, Brazil kupitia Dunga kwenda kwa Tardelli ni mfano sahihi wa kubadili gia na kutengeneza imani upya kwa Watanzania na hasa kwa kushirikiana, si kutafutana uchawi, uadui, kutishana huku wahusika wakijua tatizo ni tamaa zao na uzoefu mdogo katika masuala ya soka.