MDOGO WAKE MSUVA ASHINDWA KUPATA MKATABA SIMBA

Klabu ya Simba imeshindwa kumsajili chipukizi, James Msuva ambaye ni mdogo wa winga wa Yanga, Simon Msuva.

Tatizo lililochangia kushindwa kumsajili ni kuchelewa baada ya Msuva kuwa amekataa kusaini hapo awali.

Msuva mdogo ameonyesha uwezo mzuri lakini ilielezwa wakati Simba walipotaka kumsajili, akagoma akidai anataka kwenda Ulaya.

Akielezea sababu za kutopewa mkataba kwa mchezaji huyo, meneja wa kikosi cha vijana (Simba B), Patrick Rweyemamu, alisema James hakupewa mkataba mwaka huu, kutokana na taratibu za mikataba yao kumbana kwa kuwa awali alikataa mwenyewe.

“Bahati mbaya ni kuwa alikuwa ameshachelewa kwani tayari usajili ulikuwa umekamilika na hivyo anatakiwa kusubiri mpaka mwakani,” alisema Rweyemamu.