PLUIJM ATAKA VIUKO, WASHAMBULIAJI WAKE WAPIGE 'BUNDUKI' DHIDI YA AZAM

Ili kuhakikisha timu yake inapata ushindi wa mabao mengi, Kocha Mkuu wa Yanga, Mholanzi, Hans van Der Puijm amewataka washambuliaji wake Mrundi, Amissi Tambwe na Mliberia, Kpah Sherman kupiga mashuti wanapofika mita 20 kutoka kwenye lango la wapinzani.

Kocha huyo hadi kufikia leo Jumamosi anakuwa ametimiza siku saba tangu aanze kibarua cha kukinoa kikosi hicho akimrithi Mbrazili, Marcio Maximo.

Timu hiyo, hivi sasa ipo kwenye maandalizi kwa ajili ya mechi ya Ligi Kuu Bara dhidi ya Azam FC itakayochezwa kesho Jumapili kwenye Uwanja wa Taifa jijini Dar es Salaam.

Kocha huyo, alionekana akitoa maelekezo ya kupiga mashuti ya umbali huo wakati wa mazoezi ya timu hiyo yaliyofanyika kwenye Uwanja wa Boko Veterani jijini Dar es Salaam zoezi hilo liliwashirikisha na viungo wa timu hiyo.

Wakati timu hiyo ikiendelea mazoezi ya hayo, kocha huyo alisikika akifoka kwa kuwaambia washambuliaji na viungo hao kupiga mashuti, wakati mwingine alionekana akipiga filimbi kusimamisha mazoezi hayo na kutoa maelekezo kwa wachezaji wake.

“Kuna sababu gani ya kutoa pasi mnapokaribia kwenye goli, mnapokaribia goli la wapinzani wetu mnatakiwa kupiga mashuti na siyo kupigiana pasi zisizokuwa na msingi.

“Tambwe na Sherman mnatakiwa mlitambue hilo, sitaki lijitokeze tena mazoezini na kwenye mechi, kikubwa kinachoangaliwa ni ushindi,” alisikika kocha huyo akiwaambia wachezaji wake.