YANGA KUUKATA MSHAHARA WA JUMA KASEJA

Suala la kipa wa Yanga, Juma Kaseja linaendelea kuzunguka ndani ya Kamati ya Nidhamu ya Yanga, hata hivyo kuna taarifa kuwa bado kipa huyo mkongwe atakatwa mshahara.

Imeelezwa kuwa jina la Kaseja limepelekwa kwenye kamati hiyo kutokana na kugoma kufanya mazoezi na kikosi hicho baada ya kuwepo migogoro ya hapa na pale lakini kubwa ni kuhusu malipo ya fedha zake za usajili alizokuwa akidai.

Taarifa nyingine zinasema Kaseja hakuwa amekataa kufanya mazoezi lakini amekuwa hajibiwi barua zake baada ya suala la kuchelewa kumlipa lilianzisha mgogoro kwisha.

Kutokana na hilo, hata baada ya kuelezwa kuwa pande mbili hizo zimeshakamilishiana malipo hayo lakini Yanga ikamwekea ngumu kurudi mazoezini mpaka suala lake litakapokwisha kwenye kamati ya nidhamu, lakini hapo hapohapo ndiyo likaibuka hili la mshahara.

Ofisa Habari wa Yanga, Jerry Muro ameliambia Championi Jumamosi kuwa Yanga ina taratibu zake kwa mchezaji anayekosa kuhudhuria mazoezini na kwenye mechi bila ya sababu maalum, hivyo adhabu yake katika hilo bila ya kujadiliwa mahala popote ni kumkata mshahara mchezaji huyo.

“Yaani mchezaji asipokuja mazoezini bila sababu maalum hiyo inakuwa ni tatizo zaidi kwa upande wake kwa sababu inaeleweka hata kama suala lisipofika kujadiliwa kwa uongozi lazima mchezaji atakatwa mshahara na hilo lipo wazi na linaeleweka.

Tangu Yanga ianze mazoezi Novemba 24, mwaka huu kwa ajili ya kujiandaa na ligi kuu raundi ya nane, Kaseja amekuwa akikosekana mazoezini mpaka yale ya mwisho ya timu hiyo yaliyofanyika Jumatano kwenye Uwanja wa Boko Veterani, Ununio, nje kidogo ya Dar.