YANGA, SIMBA WAMEMALIZA SIKUKUU YA KRISMASI JANA KAMA MWAKA JANA

INGAWA ilikuwa jana, lakini kheri ya sikukuu ya Krismasi tukiwa tunaelekea mwaka mpya, nawaombea wadau wote wa safu hii ya Hoja Yangu kila la kheri katika maisha yenu ya kila siku.

Naamini salamu zangu pia zitafika kwa wadau wengine wa michezo na hasa wale wa soka ambao wamekuwa wakiifutilias afu hii kwa ukaribu zaidi.

Baada ya salamu, kidogo leo ningependa kujadili mambo kisikukuu kidogo huku nikijaribu kuangalia hawa jamaa zetu, wenzetu na ndugu zetu, Yanga na Simba wanaojulikana kwa jina la ukongwe, wamefanya nini?

Ukitaka kufanya tathimini kwamba Yanga na Simba wamefanya nini tokea sikukuu ile ya Krismasi hadi mwaka mpya unaokuja, utagundua hakuna.

Badala yake ni vitu vilevile vya mazoea ambavyo kuanzia uongozi, wanachama hadi mashabiki ni wamemfunga nani, wamemsajili nani, basi.

Simba wanaendelea kujivunia kwamba wanapokutana na Yanga, wao hawafungiki. Katika misimu hii miwili wamekuwa wakiwanyanyasa, hilo halina ubishi.

Yanga nao wanaongoza kwa kusajili wachezaji, tena ghali, kutoka nchi mbalimbali zikiwemo hadi za Afrika Magharibi.

Simba wanaweza kusema ndiyo timu ya Tanzania ambayo imeweka rekodi mpya tokea ile kanuni ya timu za Tanzania kusajili wachezaji wa kigeni watano tu ilipopitishwa. Maana wachezaji wao wote watano, wanatokea nchini Uganda!

Labda kunaweza kuwa na sifa ya kwamba wamechagua viongozi wapya na wameanza kazi. Lakini nao wameingia Krismasi, wakiwa hata hawajaanza kutengeneza uwanja wa mazoezi angalau.

Yanga ndiyo waliishaonyesha ramani, hakuna walichofanya hadi leo zaidi ya kuelezwa mambo yataanza hivi karibuni, ramani ipo!.

Krismasi ile, hadi hii ya jana, sasa tunaelekea mwaka mpya, mambo yanaweza kuendelea kubaki vilevile.

Ninaamini kila Krismasi zinavyoongezeka, tunazihesabu na kuziacha nyuma nyingine huku Yanga na Simba zikiendelea kubaki zilizo, maana yake tunaziacha nyuma.

Mimi na wewe tunapoziacha nyuma, maana yake dunia inawaacha nyumba watu wa Yanga na Simba na wanaendelea kuwa na maendeleo ya Krismasi ya mwaka 1990, wakati tumeingia mwaka 2015.

Kuanza leo ni bora zaidi kuliko kusubiri kesho. Yanga na Simba wanaweza kuwa na vitu vingi sana vya kujivunia kuhusiana na klabu yao. Chepesi zaidi kuliko vingine ni rangi za njano na kijani na nyekundu na nyeupe.

Hizo zitakuwa ni zao milele, hawahitaji kuzikarabati wala kuzibadili, ndiyo mali pekee ambayo haiumizi kichwa kwao.

Lakini ukweli ni lazima kila kiongozi awe na plani ya kujivunia kuangalia kipi amefanya baada ya muda fulani. Krismasi hadi Krismasi ni mwaka mzima.

Kwa kiongozi yoyote mpenda maendeleo lazima atajiuliza kuwa katika kipindi cha miezi 12 amefanya kitu gani cha kujivunia na anatakiwa kuendelea kufanya nini.

Ninaamini viongozi wa sasa wa juu kabisa wa Simba na Yanga hawawezi kuwa na sifa ya kutaka kufaidisha matumbo yao. Lakini hilo nalo halitakuwa na maswali hata kidogo kama wakionyesha mwelekeo tofauti wa maendeleo ya klabu.

Kusajili wachezaji wa nje, kuishinda timu nyingine, yote hayo yataendelea kuwepo na kamwe hayawezi kuingia kwenye rekodi ya maendeleo na badala yake yatabaki kwenye rekodi za uchezaji wa timu au perfomance.

Kipimo cha kwamba kiongozi fulani aliingoza timu kuinyanyasa Yanga au Simba wakati akiwa madarakani, halafu hakuna maendeleo mengi, sasa imepitwa na wakati.

Simba na Yanga zinapaswa kuendana na ukubwa wa historia yao badala ya kuwa na mwili mdogo halafu zinalazimisha kuvaa nguo kubwaaaaa!