PONDAMALI ASEMA KUACHWA KWA KASEJA CAF SIYO ISHU

Baada ya kipa, Juma Kaseja kuachwa kwenye kikosi cha Yanga kitakachoshiriki michuano ya kimataifa kocha wa makipa wa timu hiyo, Juma Pondamali ‘Mensah’ amesema kukosekana kwa nguli huyo siyo tatizo kwani timu bado ina makipa wazoefu na wenye uwezo.

Yanga imepangwa kuanzia nyumbani katika michuano hiyo kwa kucheza na timu ya jeshi ya Botswana, BDF IX kati ya Februali 13 hadi 15 mwaka huu na tayari imetuma majina 23 kwenda Caf, huku Kaseja ‘akimwagwa’.

Akizungumza na Championi Jumamosi, Pondamali alisema kukosekana kwa kipa huyo siyo tatizo kwa kuwa waliopo wana uzoefu, ndiyo maana hata Deogratius Munishi ‘Dida’ anaidakia timu ya taifa, Taifa Stars.

“Kaseja ni kipa mzuri mwenye uzoefu katika soka la kimataifa, hilo silipingi, lakini kukosekana kwake siyo ishu kwani makipa waliopo wana uzoefu na michuano hiyo.

“Binafsi sijui kama jina lake limetumwa Caf au la, lakini kama kweli halijatumwa bado Yanga ina nafasi ya kufanya vizuri kulingana na aina ya makipa tulionao,” alisema Pondamali.