SUPERSPORT WANAPASWA KUZILIPA YANGA, AZAM FC NA NYINGINE ZINAZOSHIRIKI KAGAME

MICHUANO ya Kombe la Kagame sasa imepamba moto na inaonekana hatua ya robo fainali, utamu utazidi kunoga zaidi.

Timu ambazo zilikuwa hazipewi nafasi kubwa sana, zimeonyesha soka safi na la kuvutia na kuwapa wakati mgumu vigogo.

Wachezaji waliokuwa wakipewa nafasi ya kutamba, wako ambao hawajaonyesha cheche na kuna wengine ambao hawakuwa wakipewa nafasi wameanza kuonyesha makali yao.

Makocha ambao waliaminika timu zao zitasonga kwa  ulaini zimekutana na ugumu wa hali ya juu, huku kukiwa na baadhi ya timu hazionyeshi soka la kuvutia, lakini zinafanya vema.

Unaweza kusema ni michuano ambayo ina mambo yanayoonekana, mambo yanayoweza kuwa changamoto na pia yanayozua maswali mengi katika soka la Afrika Mashariki na Kati.

Nchi mbili za Tanzania na Rwanda, ndiyo sehemu ambayo michuano hiyo imekuwa ikipata changamoto kubwa na kufanya vema. Utaona mwamko wa michuano ya mwaka huu, huenda utapaa juu zaidi kama Yanga na Azam FC zitaendelea kufanya vema.

Tatizo ninaliona moja, wadhamini ni wachache na utaona hata zawadi za washindi zinaendelea kuwa kidogo sana.

Bingwa atachukua dola 30,000 (zaidi ya shilingi milioni 50). Mshindi wa pili dola 20,000 (zaidi ya shilingi milioni 35), huku wa tatu akipata dola 10,000 ambazo ni zaidi ya shilingi milioni 18.

Fedha hizo zinatolewa na Rais wa Rwanda, Paul Kagame ambaye amekuwa akifanya hivyo kwa zaidi ya miaka mitano sasa. Hongera kwake, jambo ambalo nimekuwa nikisisitiza kwamba wengine wanaweza kumuunga mkono rais huyo, kabla hajachoka.

 

Wakati tunaomba Baraza la Vyama vya Soka Afrika Mashariki na Kati (Cecafa) liendeleze juhudi kuhakikisha udhamini unapatikana na kuamsha changamoto kubwa na ushindani wa juu zaidi, nataka nihoji kuhusu udhamini wa SuperSport.

SuperSport ni moja ya runinga kubwa kabisa barani Afrika na duniani kote. Nimewahi kufanya kazi makao makuu yake ya Afrika Kusini kama sehemu ya mafunzo yangu, ninaweza kuthibitisha utajiri wao mkubwa.

Wao ni kati ya wadhamini wa michuano hiyo na wamekuwa wakiionyesha moja kwa moja na inawezekana ni jambo zuri kwa kuwa timu zinapata nafasi ya kuonekana na wachezaji wanaonekana karibu Afrika kote na sehemu nyingine duniani.

Kitu pekee ambacho ninataka kujua, udhamini huo vipi hauwezi kuzifaidisha timu kifedha? Kwamba kabla ya zawadi, Yanga, Azam FC na timu zote zilizoshiriki michuano hiyo zilipaswa kulipwa.

Lazima tukubali, dunia ya sasa imebadilika, fedha za runinga ni sehemu kubwa ya mapato katika ligi kubwa za Ulaya, Asia, Amerika Kusini na kwingineko kulipoendelea kisoka.

Sasa vipi hapa nyumbani, tena katika ukanda huu timu zisipate fedha? Maana kila mechi inapoonyeshwa ‘live’, mashabiki wengi wanaacha kwenda uwanjani.

Kitaalamu hapa timu zinapata hasara, kama hazipewi kitu, basi lazima tukubali zitakuwa zinatumika vibaya na kama udhamini huo Cecafa inachukua kila kitu, basi kuna tatizo.

Klabu lazima zikubali kwamba bila zenyewe hakutakuwa na Cecafa. Lazima viongozi wake waamke na kuhoji kwamba SuperSport imetoa kiasi gani na zenyewe zinapata nini.

Kwani Cecafa inashughulikia kukuza vijana? Hapana. Sasa kama inalipwa na SuperSport, fedha zote zinakwenda wapi? Ni kulipa waamuzi na malazi ya timu? Kama ni hivyo tu, basi tujue mkataba huo unaipa Cecafa fedha kiasi gani kila mwaka na mwisho wao waweke wazi matumizi.

Nasema hivi ili kusisitiza mabadiliko ya timu zetu, hasa za Tanzania kuendelea kutumiwa tu huku wachache wakifaidika kwa faida yao. Haya lazima yawekwe wazi ili tuwe katika ulimwengu wa uwazi.

Si rahisi tuendelee kukubali kukaa kimya, tukionyesha uoga au nidhamu ya uoga wakati mambo yanaendelea kudidimia. Klabu zinaingia gharama kubwa, eti kisa zinaonekana ‘live’. Mtafakari hili, mimi naweka akiba, nitarudi tena.