Na Saleh Ally
SIMBA ndiyo hivyo imeanza Ligi Kuu Bara kwa ushindi wa bao 1-0
dhidi ya African Sports. Maana yake imefuta hofu kuu ya mashabiki wa timu hiyo.
Unakumbuka msimu uliopita? Simba ilipata sare sita katika mechi
zake za kwanza na kuzua hofu kubwa. Huenda hilo limeondoka na sasa inaweza
kuingia kwenye hesabu ya timu zinazowania ubingwa kama itaendeleza ushindi.
SALEHJEMBE imefanya mahojiano maalum na Mwenyekiti wa Kamati ya
Usajili ya Simba, Zacharia Hans Poppe siku moja kabla ya mechi hiyo ya Simba ya
ufunguzi wa Ligi Kuu Bara, lengo kutaka kujua kama ameridhika na usajili huo na
utaifikisha Simba ambako Wanasimba wanatarajia baada ya maumivu makali ya msimu
uliopita.
“Nimeridhika, naweza kusema kwa asilimia tisini nimeridhika, lakini
hapa sasa linafuata suala la kuangalia timu inacheza vipi na kama kuna upungufu
tena, basi tunajua nini cha kufanya,” anasema Hans Poppe.
SALEHJEMBE: Kwa hali ilivyo,
inaonekana Simba mmetumia fedha nyingi maana mmekuwa mkileta wachezaji wengi
bomu!
 |
| NIANG |
Hans Poppe: Kweli kuna
wachezaji walikuwa bomu, lakini si gharama ya Simba na kama ipo ni kidogo sana.
Nimeona mmekuwa mkilaumu, lakini hamjui mambo yalivyo.
Kawaida mawakala ndiyo wamekuwa wakiwaleta wachezaji wao na
gharama ya tiketi inakuwa yao.
SALEHJEMBE: Kama mchezaji
mkimkubali, bado inakuwa ni gharama ya wakala na utaratibu uko vipi hadi
wamlete mchezaji?
Hans Poppe: Kama mchezaji tumeona anafaa, basi gharama zote za
safari zinakuwa juu yetu. Kama hatujamkubali, gharama ni za wakala.
Kuhusu utaratibu, hawa mawakala ni watu wanaouwinda msimu, wakijua
dirisha liko wazi wanakutafuta, wengine nilikutana nao World Cup kwenye
(Fainali za Kombe la Dunia), hivyo tukawa na mawasiliano.
 |
| OKWI |
SALEHJEMBE: Mawakala kutoka
Afrika Magharibi wanajulikana kwa utapeli, mliliangalia hilo?
Hans Poppe: Tuko makini sana kuliko mnavyofikiri, ndiyo maana hata
wachezaji ambao mawakala hawakutaka wafanye majaribio mimi nilisisitiza lazima
wafanye majaribio. Mfano yule bomu Papa Niang, wakala wake alilazimisha
asifanye majaribio, nikakataa.
SALEHJEMBE: Vipi mlimuuza
Okwi wakati ndiye alikuwa injini ya kikosi, hamuoni mlikurupuka na fedha yenyewe
haikuwa ya kutisha?
Hans Poppe: Hakika haikuwa fedha nyingi sana, tumemuuza kwa dola
110,000 (Sh milioni 220,000). Awali wale jamaa walimtaka kwa dola 150,000
lakini tulikataa na hii inaonyesha hatukuwa tayari kumuuza.
Ilionekana Okwi anataka kwenda, aliamua kutumia kile kipengele cha
kwenye mkataba ambacho anaweza kununua mkataba wake. Niseme kweli alituvuruga
kwa kuwa hakikuwa kipindi mwafaka cha kumuuza na hatukutaka.
Ndiyo maana utaona, wale Al Markhiya, juzi hapa wamerudi wanamtaka
tena Kazimoto kwa dola 150,000 lakini tumekataa, maana tutakuwa tunavuruga timu
kila wakati.
 |
| MAVUGO |
SALEHJEMBE: Unaridhika na
safu yenu ya ushambuliaji ambayo inaonekana kumkosa Laudit Mavugo na imekuwa ni
kama tatizo kwenu?
Hans Poppe: Kwa sasa ninaweza kusema ndiyo, tuna Mgosi (Hassan),
Kiiza (Hamis) unajua ni wazuri kwa kufunga. Yupo Ajibu pale, tunaweza kwenda
tukapambana na kufanya vizuri.
Kuhusu Mavugo kweli, tulikuwa ndiyo tumempa nafasi ya ushambuliaji,
lakini Warundi ni watu wanaoishi bila utaratibu katika soka. Hadi leo hata ITC
ya yule beki hawajatuma, hali kadhalika Wakongo nao hawajatuma ITC ya Lyanga,
ni tatizo sana.
Ndiyo maana tukakimbilia kwa Kiiza, angalau ni mtu ambaye tunamjua
na hatuwezi kuwa na hofu sana.
SALEHJEMBE: ITC hazijatumwa,
nanyi mmeamua kulala hadi zitakapotumwa hata iwe mwakani?
Hans Poppe: Hapo sasa ndiyo TFF wanapaswa wafanye kazi yao, hayo
ni mawasiliano ya shirikisho na shirikisho na hata ikishindikana wanaweza
kutuombea kibali cha muda Fifa. Nashangaa wamekaa kimya tu, anayeshughulikia
masuala ya uhamisho kwani hajaliona hilo?
SALEHJEMBE: Yule Msenegali
mliyemsajili, mmeridhika au presha tu mkaona acha mfunike kombe?
Hans Poppe: Hapana, yule ni mchezaji kijana na anaonekana ana vitu
vizuri. Anahitaji muda na benchi zima la ufundi limekubali na kumpitisha.
Utaona ana umbo zuri, mrefu ana futi 6.6 si mchezo. Atakuwa tatizo
kwa makipa na baadaye lazima atasumbua sana. Mimi nina imani naye, pia atafanya
vema hasa kama akiwa na malengo.
SALEHJEMBE: Kipa raia wa
Ivory Coast alikuja Azam FC, wamemuacha ghafla kaja kwenu, mmemsajili na
mkaachana na Ivo Mapunda! Hii ilikuwa katika mipango?
Hans Poppe: Kweli hatukuwa
na mpango naye, lakini usumbufu wa Ivo ndiyo ulichangia tuanze kuangalia njia
mbadala. Alikuwa mtu tunayemuamini ndiyo maana tulimlipa hadi fedha za usajili
mapema tu.
Shida ikawa ni yeye kuja kusajili, kila mara ana udhuru, sijui
hivi sijui vile. Nyie hamjui mambo ya ndani, wachezaji wa Tanzania wana mambo
yanaudhi sana.
Tukaona tusije tukaingia kwenye aibu ya kuingia msimu mpya bila
kipa, tungechekesha. Huyu kipa kutoka Ivory Coast ni mzuri, mzoefu ingawa
kapewa kazi ya kuhakikisha anakuwa fiti hasa.
 |
| HANS POPPE... |
SALEHJEMBE: Ikitokea usajili
wa Simba ukaonekana haukuwa mzuri, uko tayari kubeba lawama kama mwenyekiti wa
kamati?
Hans Poppe: Lawama kivipi? Kamati ya usajili haipaswi kubeba
lawama yoyote kama usajili utakuwa na walakini. Hamjui utaratibu unavyokuwa kabla
ya mchezaji kusajiliwa.
Kuna njia nyingi lakini kamati ya ufundi ndiyo inayoleta majina,
kamati ya usajili inafanyia kazi na baada ya hapo benchi la ufundi linahusika.
Sasa kwa nini uilaumu kamati ya usajili? Nafikiri ambao hawajui
kuhusu hili, wanapaswa kulielewa namna hiyo.
0 COMMENTS:
Post a Comment