KISA UMEME WA TANESCO, KESI YA YANGA, KASEJA YAAHIRISHWA

Kesi inayomkabili kipa wa Mbeya City, Juma Kaseja dhidi ya klabu ya Yanga imeahirishwa hadi mwishoni mwa mwezi ujao.

Kesi hiyo inayosikilizwa katika Mahakama ya Kazi Kitengo cha Usuluhishi imeshindwa kusikilizwa baada ya kutokuwa na umeme.

Yanga inamshitaki Kaseja kwa madai ya kukiuka mkataba wake, kushindwa kwenda kazini bila ya taarifa jambo ambalo lilikuwa ni kinyume na makubaliano yao.

Kutokana na tatizo hilo ambalo sasa ni nchi nzima baada ya Shirika la Umeme Tanzania (Tanesco) ambalo limekuwa halina uhakika na mambo mengi kutangaza linafanya marekebisho kupitia mtambo wa Kinyerezi jijini Dar es Salaam.

Tanesco imetangaza siku moja tu kabla ya kukata umeme, jambo ambalo limeleta usumbufu mkubwa kwa wakazi na wateja wake.

Kutokana na hali hiyo, kazi sehemu mbalimbali zikiwemo katika ofisini za serikali na binafsi zimesimama kabisa ingawa bado wachumi hawajaeleza kwamba taifa litaingiza kiasi gani kutokana na hatua hiyo.

Sasa kesi ya hiyo ambayo Yanga ni mlalamikaji na Kaseja ni mshitakiwa itasikilizwa mwezi ujao mwishoni, matarajio yakiwa Tanesco watakuwa wamerudisha umeme mambo yaende kama yanayotakiwa.