HUYU NDIYE MSUDANI ALIYECHUKUA NAFASI YA TENGA CECAFA

TENGA AKIWA NA DK MUTASIM

Rais wa Chama cha Soka cha Sudan (SFA), Dk Jaffar Mutasim, amechaguliwa kuwa rais mpya wa Baraza la Vyama vya Soka Afrika Mashariki na Kati (Cecafa), jana akichukua nafasi ya Leodegar Tenga wa Tanzania.

Mutasim amechaguliwa kuchukua nafasi hiyo kutoka kwa Tenga ambaye alikaa madarakani tangu mwaka 2007. Tenga ameongoza Cecafa kwa vipindi viwili vya miaka minne-minne.

Katika uchaguzi uliofanyika jana jijini hapa, Mutasim alipata kura sita kati ya 10 zilizopigwa na kuwapiku wapinzani wake Mganda, Lawrence Mulindwa aliyepata tatu na Mrwanda Vincent Nzamwita (1) na Juneid Bashar Tilmo wa Ethiopia aliyejitoa.

Baada ya matokeo hayo, Mutasim aliwashukuru wajumbe waliomchagua na kwamba atahakikisha anapigania mchezo huo uweze kusonga mbele.

Viongozi mbalimbali wa soka wakiwemo wale wa Shirikisho la Soka la Kimataifa (Fifa), walihudhuria uchaguzi huo akiwemo Makamu wa Rais wa Shirikisho la Soka la Kenya (FKF), Robert Asembo.