MAJEGWA: AZAM FC WANIACHE TU NIENDE ZANGU, HUU NDIYO WAKATI MWAFAKA

Kiungo mshambuliaji, Brian Majegwa amesema angependa kuondoka Azam FC.

Majegwa amesema Azam FC haikumtendea haki kwa mambo mengi, hivyo bora aangalie utaratibu mwingine kistaarabu.

Majegwa raia wa Uganda kwa sasa anafanya mazoezi na Simba ambayo ameiandikia barua kuomba apewe nafasi ya kufanya mazoezi.

“Ninafurahia kuona Simba wamekuwa waelewa na kunipa nafasi ya kufanya nao mazoezi.

“Pia ninasikia faraja kuona watu wanaweza kukubali ombi lako wakiamini unataka kukilinda kipaji chako,” alisema Majegwa.

“Lakini kwangu ni wakati mwafaka wa kuondoka Azam FC, nina mengi ya kusema kwa nini nitafanya hivyo, lakini si sasa,” alisema.

Majegwa alipekwa kwa mkopo KCCA baada ya kuonekana Kocha Stewart Hall hakuwa akifurahishwa na kiwango chake, jambo ambalo Mganda huyo, hakulifurahia.