CCM KIRUMBA HAKUISHI VITUKO, SAFARI HII MLINZI AMCHAPA MWAMUZI WA KIKE

Katika hali iliyozua sintofahamu, mlinzi wa getini kwenye Uwanja wa CCM Kirumba, wikiendi iliyopita alijikuta akimshushia kipigo mwamuzi wa kike kabla ya mechi ya Ligi Daraja la Pili kati ya Pamba na Bulyanhulu FC.

Mwamuzi huyo, Martha Joshua ambaye siku hiyo alipewa majukumu ya kuwa mwamuzi wa akiba katika mchezo huo, alizuiwa kuingia uwanjani na mlinzi huyo ambaye jina lake halikufahamika hali ambayo ilizua mtafaruku.

Filamu kamili ilikuwa hivi; Martha akiwa na waamuzi wenzake akiwemo Daniel Warioba, walifika getini hapo na kujitambulisha, wawili wakaruhusiwa kuingia lakini Martha licha ya kuonyesha vielelezo vyote vya wasifu wake bado mlinzi huyo aliweka ngumu akimtaka alipe kiingilio ndipo akalazimisha kuingia.

Wakati Martha akiingia kulikuwa na majibizano makali, ndipo ghafla makofi yakatembea kwa wawili hao na kusababisha mvutano na vurugu iliyodumu kwa dakika kadhaa kabda ya kuamuliwa na Martha kuingia ndani.

Alipoulizwa Mwenyekiti wa Waamuzi Mkoa wa Mwanza, Jumanne Shengelo, alisema:  “Yawezekana wana visa vyao hao, sisi hatujapata ripoti hiyo.” Alipoulizwa Martha alisema: “Sikupeleka ripoti kwa kuwa mlinzi hakuwa muungwana, nikaamua kuachana naye.”